Actualmain sajan mo anc duas dunnas en il Cussegl federal. E sche Doris Leuthard ch'è il pli ditg en uffizi sa retiria, restass mo anc ina dunna, ha ditg la presidenta dals Verds Regula Rytz en intervistas cun las gasettas 24 Heures e Tribune de Genève.
Ch'il Tessin saja represchentà en il Cussegl federal saja impurtant, ha Rytz manegià. L'egualitad saja però er ina tematica decisiva per sia partida.
Plinavant ha Regula Rytz accentuà ch'il Cussegl federal saja stà fitg innovativ e progressiv cura che quatter dunnas eran da la partida. Quella maioritad haja decidì d'extrar da l'energia atomara.
Be inA candidatA dal Tessin
La PLD dal chantun Tessin ha decidì da proponer be in candidat u ina candidata per la successiun da Didier Burkhalter. Sco favurit vala il schef da fracziun e cusseglier naziunal, Ignazio Cassis. Ma er l'anteriura cussegliera naziunala Laura Sadis, ch'è actualmain cussegliera dal stadi en il Tessin, na sclauda betg ina candidatura.
Las secziuns chantunalas da la PLD han anc temp fin ils 11 d'avust da far propostas per la successiun da Cusseglier federal Didier Burkhalter. La fracziun vul decider il prim da settember davart la candidatura uffiziala. L'elecziun dal nov cusseglier federal u da la nova cussegliera federala è lura ils 20 da settember.
RR novitads 11:00
