Siglir tar il cuntegn
Inhalt

Svizra In zic pli paucs daners per il Grischun

L'administraziun da finanzas federala ha calculà ils pajaments per la gulivaziun da finanzas per l'auter onn. Tenor questas survegn il chantun Grischun radund 270 milliuns francs, levet pli pauc che quest onn.

Purtret dad Ueli Maurer en il parlament a Berna.
Legenda: Minister da finanzas, Ueli Maurer. La gulivaziun da finanzas marscha sur ses departament. Keystone

Proxim onn pajan Confederaziun ed ils chantuns ritgs 5,091 milliardas francs per la gulivaziun da finanzas. Quai èn radund 100 milliuns francs dapli che quest onn. Per l'augment èn responsablas las pli autas expensas a chantuns cun ressursas flaivlas. Lez chantuns survegnan entras la gulivaziun da finanzas avunda meds finanzials. Finamira è quà da vegnir sin 85% da la media svizzra. Las contribuziuns chantunalas vegnan eruidas entras il potenzial da ressursas e quant che las taglias portan.

Tutitg dat il pli bler a la gulivaziun

Tenor l'administraziun da finanzas federala èn quests pajaments creschids massivamain per l'auter onn, da 1,599 milliardas sin 1,652 milliardas. Il chantun che dat il pli bler per la gulivaziun resta il chantun Turitg cun radund 529 milliuns francs, suandà da Genevra cun 394 milliuns francs e Zug cun 311 milliuns. Il chantun Zug e quai chantun che ha dentant pers il pli bler potenzial da resursas. El perda 20 puncs da l'index. Quai è er il motiv ch'il pajament da quai chantun giascha 29 milliuns pli bass per l'onn proxim.

Medemamain pers potenzial da resursas han ils chantuns Neuschatel, Schaffusa e sis ulteriurs chantuns. Il Vad daventa entras la perdita tar l'index in chantun che survegn contribuziun. Creschids en l'index ün ils chantuns da la Sutsilvania, Genevra, Sursilvania e 13 ulteriurs chantuns, uschia daventa la Sursilvania in chantun che dat contribuziun, quai radund 1,5 milliuns francs.

Berna survegn il pli bler da la gulivaziun

La Confederaziun paja quest onn radund 2,424 milliardas francs per la gulivaziun da finanzas, quai èn radund 3,1% dapli che quest onn. Bun 1,2 milliardas van al chantun Berna, ch'è cun distanza il chantun che retschaiva la pli gronda contribuziun. Il Vallais survegn 620 milliuns francs, Son Gagl survegn 451 milliuns ed il Grischun survegn 268 milliuns. Quai è levet pli pauc che quest onn.

Tar la gulivaziun da finanzas vegnan resguardads trais facturs:

  • Gulivaziun da resursas
    En la gulivaziun da resursas van ils pli blers raps. Per calcular quant che mintga chantun survegn per la gulivaziun da resursas vegn resguardada en prima lingia la taglia.
  • Cumpensaziun da l'inegualitad
    Qua vegnan resguardadas las premissas dals chantuns. Per exempel las premissas geograficas. Il chantun Grischun è in chantun muntagnard ed ha perquai autras premissas ch'ils chantuns da la bassa.
  • Gulivaziun da las grevezzas
    Chantuns che han pli pauc pervia da la gulivaziun da finanzas survegnan la gulivaziun da las grevezzas per ch'els pon s'adattar a la situaziun. Quest import e limità fin il 2036.

RR novitads 11:00