Siglir tar il cuntegn

Svizra In zercladur chaud lascha cular la biera

Grazia al chaud è il consum da biera sa sminuì mo per pauc tenor l’Uniun da bierarias svizras. Entant ch’ils imports èn sa reducids massivamain, han las bierarias indigenas raschun da sa legrar.

Pliras buttiglias da biera da Tschlin
Legenda: Las bieras da Tschlin èn prest gia classichers en la scena da bieras svizras. ANR, Flurin Andri

Bain è la vendita da biera sa reducida l’onn da fatschenta 2016/17 per 0,2% sin 4,61 milliuns hectoliters. Tuttina è quai stà in onn da success per las bierarias svizras. Ellas han pudì augmentar lur producziun per bunamain 1% sin 3,5 milliuns hectoliters biera. Quai ha communitgà l'Uniun da bierarias svizras SBV.

Marcas svizras cun success

Uschia è var trais quartas da la biera bavida en Svizra biera indigena. Percunter è l’import sa reducì per 3,4% sin 1,1 milliun hectoliters. La ferm’influenza da l’aura sin il consum da biera saja era sa mussada la stad passada, scriva l’uniun. Il zercladur chaud saja la producziun stada bunamain 10% pli auta che l’onn avant.

Mintgin sia atgna biera

Il plaschair dals Svizzers da fundar sez ina bieraria resta grond. Il settember passà ha l'Administraziun federala da duana dumbrà 833 bierarias, 100 dapli ch'anc in onn avant. En relaziun cun il dumber da populaziun ha la Svizra la pli auta spessezza da bierarias da l'entir mund.

Sco bieraria vala, tgi che fa, distribuescha u venda pli che 400 liters biera ad onn. La finala derivan però 99,2% da la biera svizra da mo 49 bierarias.

RR novitads 15:00