Siglir tar il cuntegn
Inhalt

Svizra In pertschient da la populaziun svizra resta povra

Il 2016 eran 615’000 persunas povras. Entant che la gronda part dals povers han suenter in onn puspè in'entrada sur la limita da povradad, resta in pertschient da la populaziun svizra povra.

Bratsch che tegna vi in bitger da chartun per survegnir in zic munaida.
Legenda: En Svizra è mintga otgavel gia sta pertutgà da la povradad. Keystone
  • Cumpareglià cun il 2015 è la quota da povradad en Svizra creschida da 7 sin 7,5 pertschient. Quai mussan las cifras da l'Uffizi federal da statistica, BFS.
  • Da las persunas che lavuravan, vivevan 3,8 pertschient sut la limita da povradad. Quai correspunda a 140’000 persunas.

L’onn 2016 èn, tranter auter, persunas che vivevan sulettas, persunas che creschan si sulettas uffants minorens e persunas che n’han fatg nagina furmaziun suenter la scola obligatorica vegnidas valitadas sco povras.

La povradad è per il pli temporara

L'Uffizi federal da statistica ha analisà per l’emprima giada quant ditg che las singulas persunas èn pertutgadas da povradad. Dal 2013 al 2016 è mintga otgavla persuna, en almain in onn, vegnida valitada sco povra.

Tenor il BFS ha la gronda part dals pertutgads gì relativamain svelt puspè entradas sur la limita da povradad. En la perioda da temp examinada eran be 0,9 pertschient da la populaziun adina povers.

Tge è povradad?

Sco pover valan, tenor la definiziun uffiziala, persunas che n’han betg ils meds finanzials per cumprar ils bains e servetschs ch’èn necessaris per avair ina vita integrada en la societad. Il 2016 era la limita da povradad per persunas singulas tar 2247 francs il mais e tar 3981 francs per ina famiglia cun dus uffants.

En cumparegliaziun cun auters pajais da l'Europa, ha la Svizra ina da las pli bassas quotas da persunas ch'èn periclitadas da restar sur in lung temp povras.

RR novitads 11:00