Lola, Pepi, Charly, Shaggy, Safira – quai èn inquals dals giats cun handicap che vivan sin il bain da Hanni Kessler in pèr tschients meter sur Bogn Ragaz. Enturn il bain datti gronds prads, uschia ch’ils animals pon giudair la saira da lur vita en pasch ed armonia.
Tschorv enfin paralisà
Tut en tut ha Hanni Kessler 20 giats, 8 chauns e 12 giaglinas. Tut ils giats ch’ella ha, vegnan da l’exteriur u èn vegnids chattads sin via. Blers dals giats han in impediment. Tranter auter ha ella sin ses bain in giat paralisà, dus giats tschorvs ed in giat cun ataxia. Tenor Hanni Kessler acceptian ils animals fitg bain in l’auter, uschia ch’i na dettia quasi mai charplinà tranter chauns e giats. Ella è sa decidida da be prender giats cun handicap, perquai che quels hajan pauca schanza da vegnir adoptads.
Organisaziun è essenziala
Far vacanzas cun uschè blers animals n’è betg pussaivel, dentant quai na disturba Hanni Kessler betg. Mintgadi èsi da pavlar ils animals duas giadas Il giat paralisà dovria dapli sustegn, tar quel saja da midar il sdratsch 4 giadas a di. Da vesair, co ch'ils animals sa fidian puspè dal carstgaun e mussian charezzia, saja bler meglier ch’ir en vacanzas.