Siglir tar il cuntegn

Header

cuntegn

Svizra Immigrants n'han betg effects negativs sin il martgà da lavur

Ils immigrants en Svizra na stgatschan betg ils indigens dal martgà da lavur. Er maina lur preschientscha strusch ad in dumping da pajas. Quai resulta da l’ultim rapport dal Secretariat da stadi per l’economia SECO.

audio
Saira: Libra circulaziun da persunas – Betg dapli dischoccupads
ord Actualitad dals 04.07.2017.
laschar ir. Durada: 3 minutas 30 Secundas.

L’immigraziun saja s’augmentada marcantamain grazia a la libra circulaziun da persunas. Dapi che la libra circulaziun è en vigur, sajan en media bun 65'000 persunas immigradas en Svizra. Bunamain dus terz vegnia da l’Uniun europeica. Quai communitgescha il SECO. La cunvegna davart la libra circulaziun da persunas è entrada en vigur avant 15 onns.

Cumpareglià cun ils stadis da l'UE è la cumpart da persunas immigradas sin la populaziun cumpletta auta. Suletamain Luxemburg ha gì ils ultims onns ina cumpart anc pli auta che la Svizra, uschia il rapport dal SECO.

Evità mancanza da forzas da lavur

audio
Mezdi: Rapport dal SECO – Indigens na vegnan betg stgatgads d'...
ord Actualitad dals 04.07.2017.
laschar ir. Durada: 3 minutas 37 Secundas.

Il SECO declera l'aut dumber d'immigrants cun in bun svilup economic en Svizra. L'economia basegna bler persunal e quel po ussa vegnir recrutà er en stadis da l'UE, grazia a la libra circulaziun da persunas.

Fitg auta è la dumonda tar persunal cun autas qualificaziuns. Senza libra circulaziun avess la Svizra gì ina mancanza da forzas da lavur. En las branschas pertutgadas èn 16% dals emploiads immigrads da l'UE. Sur tut ils roms economics pertutga la cumpart 12%.

Er persunal cun qualificaziuns bassas è vegnì recrutà pli savens dals pajais da l'UE. La populaziun haja bandunà per il pli quests champs per pli autas qualificaziuns. Dentant haja il recrutar da persunas cun qualificaziuns autas giugà la rolla principala.

Enfin ussa na vegnan Svizzers betg stgatschads

L'aut dumber d'immigrants maina dapi onns tar controversas politicas. Dentant betg be pertutgant la dischoccupaziun. Il ristg d'esser senza lavur pajada è numnadamain pli gronda tar immigrants. Ils ultims 15 onns èn dentant Svizzers sco era immigrants sa participads pli fitg a l'economia. Quai ch'è in effect positiv da la libra circulaziun da persunas.

La concurrenza en tscherts martgads saja probablamain creschida pervi da l'immigraziun, quai na possian ins betg excluder. Tschertas gruppas da la populaziun hajan uschia pli paucas schanzas da chattar là lavur.

Il medem valia per las pajas. Las pajas realas sajan creschidas en media per 0,8% ad onn. Quai saja in creschament robust, scriva il SECO. Linfluenza da l'immigraziun mussian il pli tgunsch las pajas per qualificaziuns autas che na sajan betg creschidas tant. E las pajas bassas hajan ins pudì proteger bain cun mesiras accumpagnantas.

RR novitads 11:00

Artitgels legids il pli savens