Siglir tar il cuntegn
Inhalt

Svizra «Ils Turitgais vulan engular l'uvestg»

Tenor il vicari general Martin Grichting datti in plan B sche Turitg na survegn nagin agen uvestg. Quai scriva la gasetta Südostschweiz.

Martin Grichting, il vicari general da l'uvestgieu da Cuira
Legenda: Martin Grichting, il vicari general da l'uvestgieu da Cuira Keystone

I saja la finamira da transferir zic a zic la sedia da l'uvestg a Turitg. In'emprima emprova haja dà avant 10 onns ha ditg Grichting avant la plaiv catolica da Cuira. La dretgira da lètg episcopala, l'uffizialat, saja gia transferì a Turitg ed i dettia sforz da transferir ils proxims onns l'administraziun episcopala e la finala era la sedia a Turitg.

Turitg na leva nagina retschertga

En ses referat ha Grichting punctuà che Turitg saja sa dustà fitg cunter la retschertga realisada dacurt en l'uvestgieu. L'argument saja stà ch'i saja gea tut cler uschè u uschia. L'uvestg Vitus Huonder haja dentant tuttina vulì far la retschertga.

En 10 onns è tut a Turitg

Grichting quinta ch'i duria stgars 10 onns enfin ch'er l'uvestg saja domicilià a Turitg. El vegnia lura probabel anc turnar tranteren per singuls servetschs divins en la catedrala da Cuira. Ils promoturs da l'idea da transferir l'uvestgieu veglian transferir la Liebfrauenkirche a Turitg tar ina uschè numnada cun-catedrala ed augmentar zic a zic la valur da questa baselgia ad ina catedrala.

RR novitads 6:00