Siglir tar il cuntegn

Header

Stgaffa cun medicaments.
Legenda: Medicaments generics custan en Svizra anc adina dubel uschè bler sco en pajais cumparegliabels. Keystone
cuntegn

Svizra Ils medicaments generics restan chars

Anc adina custan medicaments generics en Svizra dubel uschè bler sco en l'exteriur. La differenza da pretsch tar ils medicaments originals è dentant sa reducida levamain. Quai scrivan Santésuisse ed Interpharma.

En il decurs da l'ultim onn n'èn ils pretschs da medicaments generics betg sa midads grond. L'avrigl 2019 eran quels anc adina 48% pli chars ch'en pajais cumparegliabels. Avant in onn muntava la differenza da pretsch anc a 52%.

Potenzial da spargn tar generica

Tenor la directura da Santésuisse, Verena Nold, dessi gist en il sectur dals medicaments generics il potenzial da spargnar plirs tschient milliuns francs – e quai senza ina sperdita da qualitad. Ella pretenda perquai d'introducir il sistem da pretschs da referenza.

Cumparaziun da pretschs

Personen-Box aufklappenPersonen-Box zuklappen

La cumparaziun dals pretschs da medicaments è vegnida fatga per la 10avla giada. Cumparegliads èn vegnids ils pretschs da vendita e da fabrica da medicaments originals e generics en Svizra cun quels en Belgia, Danemarc, Finlanda, Frantscha, Gronda Britannia, Pajais Bass, Austria e Svezia.

Differenza pli pitschna tar medicaments originals

En il medem temp è la differenza da pretsch tar ils medicaments originals sa reducida. L'avrigl eran ils radund 250 medicaments protegids da patenta che vegnan vendids, il pli savens anc 7% pli chars ch'en l'exteriur. Avant in onn muntava la differenza anc a 9%.

Las raschuns impurtantas per il sbassament da quels pretschs èn tenor Santésuisse ed Interpharma il svilup dal curs da stgomi dal franc cun l'euro e las rundas da survegliar ils pretschs da l'Uffizi federal da sanadad ch'han lieu regularmain.

RR novitads 12:00