L'onn passà eran ils custs era gia creschids per prest 4%. Il pli grond factur per l'augment da custs il 2015 eran ils custs per medis ambulants cun 5,7%. Ils custs per tractaments ambulants en ospitals èn s'augmentads per 3,2%. Quels custs vegnan surpigliads cumplainamain da las cassas.
Sin fundament da questas cifras pretenda la Santésuisse che l'obligatori da contract cun medis ed ospitals vegnia schluccà. Intervenziuns da rutina duain mo pli vegnir pajads pauschalmain als medis. Tar ils medicaments pretenda l'organisaziun ch'i dettia in sistem cun pretschs fix per medicaments generics.
La FMH pretenda nova finanziaziun
La Federaziun dals medis svizzers inditgescha la midada dal tractament staziunar sin l'ambulant sco motiv principal per ils custs. Gist pazients da cancer possian vegnir tractads meglier e meglier ambulantamain.
Ils custs totals per ils pazients singuls sbassia uschia, dentant betg la premias. Ord quai motiv vul la FMH ina finanziaziun unitara per prestaziuns ambulantas e staziunaras.
RR novitads 12:00