Siglir tar il cuntegn

Header

cuntegn

Svizra Ils aviuns dal tip F/A 18 e Tiger sgolan pli ditg che planisà

A partir dal 2025 duain novs aviuns da cumbat ir en l’aria en Svizra. Per ch’ils aviuns militars dal tip F/A 18 possian restar uschè ditg sco pussibel en l’aria ston els uss vegnir rearmads per ina summa d’ina mesa milliarda francs. Era ils aviuns dal tip Tiger duajan anc cuntinuar a sgular.

  • Il minister da la defensiun Guy Parmelin ha preschentà las recumandaziuns da la gruppa d’experts per in nov aviun da cumbat.
  • Cun in credit da 10 milliuns francs duai vegnir finanziada la preparaziun per cumprar in nov aviun da cumbat.
  • En il fratemp duain ils F/A 18 sgular 6’000 e na betg mo 5’000 uras.
  • Plinavant duai ina part da la flotta dal tip Tiger sgular pli ditg che planisà.

Suenter ch’il pievel svizzer ha refusà da cumprar in nov aviun da cumbat duain ils aviuns existents restar pli ditg en acziun. Ina gruppa d’experts da la Confederaziun propona da laschar sgular ils F/A 18 fin il 2030 il pli tard.

L’onn 2025 cuntanscha la gronda part dals aviuns la fin da lur durada d’utilisaziun. Quella è fixada tar 5’000 uras da sgol. Perquai propona la gruppa d’experts da prolungar la durada da vita dals 30 F/A 18 restants sin 6’000 uras da sgol.

In nov aviun da cumbat è però tuttina necessari. Quai è la conclusiun da la gruppa d’experts. Sco quai ch’il departament federal da defensiun scriva duai il tip d’aviun vegnir tscherni il 2020. Il 2022 duai lura il parlament approvar ils meds necessaris, uschia ch’ils aviuns novs pudessan ir en l’aria tranter ils onns 2025 fin 2030.

Artitgels legids il pli savens