Siglir tar il cuntegn

Header

cuntegn

Svizra Il «Zibelemärit» – dapli che be tschagulas

Il glindesdi ha cumenzà la fiera d'atun tradiziunala «Zibelemärit» a Berna. Quest onn ha la polizia montà blocs da betun per impedir ch'i dettia attatgas d'amoc cun autos.

Plinavant ha la polizia era signalisà sortidas d'urgenza per che las persunas savessan scappar pli spert en las giassas.

Cun questas mesiras vul la polizia garantir la segirtad da las passa 10'000 persunas che visitan mintg'onn la fiera. Blers indigens han quest onn gia visità la fiera avant l'avertura uffiziala da las sis. Durant la damaun vegnan pli che 100 cars e plirs trens spezials ad arrivar cun persunas che vulan contemplar las tarscholas artisticas da tschagulas che ils Bernais numnan «Gtschungg».

Er quels che n'han betg gugent tschagulas survegnan insatge

Il «Zibelemärit» n'è dentant schon daditg betg mo pli ina fiera da verdura. Dasper tonnas da tschagulas en tuttas variaziuns datti er blers auters stans. E scadin che visita la fiera na vegn betg a savair guntgir a la savur da vin chaud e da la petta da chaschiel obligatorica.

Tarscholas da tschagulas èn gia daditg popularas

Questa fiera tradiziunala è naschida en il 19avel tschientaner. Da quel temp vegnivan las dunnas da la regiun dal Lai da Bienna a la «Martinimesse» a Berna per vender lur tschagulas.

Gia là eran las dunnas bain vesidas e quai betg mo pervia da las bellas tarscholas da tschagulas, mabain era pervia da la lur esser avert. E davent dal 2011 tutga il «Zibelemärit» tar ina da las tradiziuns las pli vivas da la Svizra.

RR novitads 08:00

Artitgels legids il pli savens