Siglir tar il cuntegn

Header

cuntegn

Svizra «Il WEF è ina schanza per Trump»

Tavau vegnia ad emprender ad enconuscher «the real Donald Trump», di l’ambassadur da l’America a Berna Edward McMullen. La motivaziun principala da Trump per vegnir al WEF saja manar enavant sia agenda politica: «America first».

La participaziun al WEF saja per Donald Trump ina schanza. El haja la pussibilità da declerar a las persunas las pli impurtantas da l’economia e da la politica tge ch'el manegia cun «Make America great again.

audio
Trump al WEF: ambassadur american Edward McMullen davart la visita.
ord Actualitad dals 10.01.2018.
laschar ir. Durada: 3 minutas 38 Secundas.
Al WEF po Donald Trump declerar sia agenda politica a las pli impurtantas persunas ord l’economia e la politica e tgirar relaziuns impurtantas per cuntanscher las finamiras da l'agenda. Il motto è «America first», ma «America first» na vul betg dir «America suletta».
Autur: Edward McMullen Ambassadur american in Svizra

Tgirar relaziuns tranter l’America e la Svizra

La decisiun da Donald Trump da vegnir al WEF saja frestga e perquai na hajan ins anc betg organisà inscunters. Edward McMullen è dentant persvas ch'i dettia inscunters tranter Trump e autoritads Svizras sco il president da la confederaziun Alain Berset. Finamira da sia emprima visita sco president american en Svizra saja er da rinforzar las relaziuns tranter l’America e la Svizra. Ina buna relaziun vegnia da bun a tuts pajais.

Ins na po betg spetgar ch'i dettia proxims pass pertutgant ina cunvegna da commerzi liber tranter la Svizra e l’America. Il è dentant bain pussaivel ch'i dettia discussiuns.
Autur: Edward McMullen Ambassadur american en Svizra

Era spera Edward McMullen che la svizra emprendia ad enconuscher Donald Trump dad in’autra vart. Tenor el haja la Svizra ina vista fitg unilaterala sin il president american.

Visita dispitaivla – Persuna controversa

Tant plaschair sco che l’ambassadur american Edward McMullen ha da la visita da Trump n'han betg tuts. La persuna da Donald Trump è fitg dispitaivla. Quai schebain tar la populaziun sco era tar politicras e politichers.

Perquai pudessi dar demonstraziuns. L'emprima è gia vegnida annunziada per questa fin d’emna a Berna. Il president american sa laschia dentant betg influenzar da quai, uschia McMullen. L’America n'haja betg tema da demonstraziuns. Demonstraziuns fetschian part da la constituziun e mintgina e mintgin duai pudair exprimer sia opiniun. Il WEF saja per Donald Trump ina da las meglras occasiuns da preschentar l’agenda politica e las finamiras per il futur da l’America – cun ni senza demonstraziuns agiunscha l’ambassadur american.

Artitgels legids il pli savens