Siglir tar il cuntegn
Inhalt

Svizra Il vi e nà pervia da las franchisas cuntinuescha

Tgi che ha tar ina cassa da malsauns ina franschisa sur 300 francs duai puspè pudair sbassar quella pir suenter 3 onns. Quai è l'idea da la cumissiun da sanadad dal cussegl naziunal. Quella elavura ina midada da la lescha.

Tgirunz che stauscha in letg.
Legenda: La revisiun vul impedir ch'assicurads sbassan la franschisa ad interim - per exempel pervi d'ina operaziun - ed auzan lura puspè quella. Keystone

Cun la revisiun vul ins impedir ch'assicurads sbassan la franschisa ad interim - per exempel pervi d'ina operaziun - ed auzan suenter puspè ella.

«In'attatga frontala sin la solidaritad»

Per la PS e per l'organisaziun da pazients da la Svizra romanda è quai in'attatga frontala sin la solidaritad. Er la PLD - ch'accepta la proposta en general, ha fadia cun il dictat. Per l'associaziun da cassas da malsauns «curafutura» na sbassia la proposta betg ils custs, mabain augmentia els.

«Rinforzar l'atgna responsabladad»

La PPS perencunter manegia ch'ins possia spargnar custs cun questa proposta ed ella survegn sustegn da l'autra associaziun da cassas da malsauns, santésuisse. En general giaja per rinforzar l'atgna responsabladad.

Cun il sistem vertent munta la franschisa da basa a 300 francs. Tar ina franschisa da 500 francs dastga la cassa da malsauns conceder in rabat da maximalmain 140 francs l’onn. Tar ina franschisa da 1500 francs munta il rabat a fin 840 francs, tar ina da 2500 francs maximalmain 1540 francs.

RR novitads 14:00