Siglir tar il cuntegn

Header

cuntegn

Svizra Il traffic da velo duai restar chaussa dals chantuns

Il Cussegl dals chantuns vul bain sustegnair il traffic da velo, però betg cun l'iniziativa da velos. Questa intervegnia tranter auter en las cumpetenzas dals chantuns. In'autra proposta per promover il vehichel ecologic ha dentant chattà sustegn.

L'iniziativa da Pro Velo «Per promover las vias da velo, ir a pe e viandar» prevesa dapli vias da velo. Per realisar quai, duai l'artitgel constituziunal per vias dad ir a pe e viandar vegnir extendì era per velos. Quai obligass la Confederaziun da metter a disposiziun contribuziuns da promoziun per vias dad ir a pe, viandar e per la rait da velo.

Daners da promoziun èn dentant per la maioritad dal Cussegl federal e dal Cussegl dals chantuns pretendì memia bler e l'iniziativa è vegnida refusada. Vias da velo sajan chaussa dals chantuns e da las vischnancas, tant il tenor general.

Sustegn ma senza obligaziun

Ch'il traffic da velo saja dentant ina buna chaussa e ch'ins possia spargnar energia ed emissiuns da CO2 èn ils cussegliers chantunals dentant perina. Ed era il Cussegl federal vul promover il med da transport ecologic e fa perquai ina cuntraproposta. Questa prevesa, che la Confederaziun possia sustegnair mesiras dals chantuns e da terzas persunas. Dentant senza obligaziun da promover la rait da velo. Dal tut gratuita è questa alternativa però betg – il Cussegl federal prevesa ina summa da var 1 milliun.

Sin questa proposta han la dretga e la sanestra cun 35 giadas «gea» e 5 giadas «na» en general reagì bainvulent. Ussa po il Cussegl naziunal anc prender posiziun.Tenor Oliver Français (PLD) sajan ils iniziants pronts da retrair l'iniziativa, sche la cuntraproposta vegnia sustegnida en las dus chombras.

RR novitads 10:00

Artitgels legids il pli savens