Raschuns per il creschament
Tenor Elvira Chekifi, experta d’allergias en la clinica alpina a Tavau, dettia quai pliras teorias per quai creschament.
- Ina raschun chattian ins tar il sistem d'immunitad. Oz vivia il carstgaun - per regla - fitg schuber, uschia ch'il sistem d'immunitad haja fitg pauc lavur. Uschia haja il corp la «peda» da s’occupar da chaussas nunprivlusas – sco per exempel la strucca da fain.
- In'autra raschun saja probabel era la polluziun da l'ambient. Entras la schletta aria vegnian ils pollens pli agressivs; quai spezialmain en las citads.
Da tge plantas u flurs vegnan ils pollens la primavaira?
Tut las plantas e flurs han pollens. Dentant n'èsi betg tut las plantas e flurs che chaschunan era strucca da fain.
Ils pollens che disturbian derivian spezialmain da plantas che vegnan derasadas dal vent, di Elvira Chekifi. Durant il temp da primavaira saja quai spezialmain plantas sco il badugn.
Flurs sco la margaritta han era pollens. Quai saja dentant pollens che na chaschunian betg la strucca da fain.
Minisguard: Ord il lexicon per noss pitschens
Tants sco anc mai pateschan ussa che la stad ha cumenzà da la strucca da fain. Ils egls larman ed il nas va pervia dal pollen ch’èn en l’aria. Ma pertge reageschan il mument uschè blers sin quest pollen?
Il Minisguard declera l’allergia la pli derasada, la strucca da fain.
Dapli tar quest tema
Strucca da fain: È l’acupunctura in’alternativa?
Enstagl da perlas e squittas, san ins era cumbatter l'allergia da pollens cun acupunctura. Era Christina Wilhelm è persvadida dal tractament tras l'acupunctura. Ella porscha en la pratica, ch'ella maina cun ses um ensemen, in tractament cumbinà cun ina cura d'ervas. Ha la strucca da fain gia cumenzà, pon ins cumbatter ils sintoms. Idealmain cumenzan ins dentant cun il tractament gia 1 - 4 emnas avant. Uschia pon ins evitar, ch'ils sintoms vegnan insumma.
Strucca da fain: terapia da las zonas da reflex dal pe
Metodas da cumbatter la strucca da fain datti pliras. La terapeuta Rosina Giuliani fa quai tranter auter cun la terapia da las zonas da reflex dal pe. Gia en las emprimas emnas pon ins uschia sminuir ils sintoms. Idealmain cumenzins dentant gia il schaner, cura che per exempel l'ogna cumenza a flurir.