Tschients dad Eritreans che vivan en Svizra cun ina permissiun da dimora transitorica han ils ultims dis survegnì posta da la Confederaziun cun l'infurmaziun che lur status vegnia examinà da nov. Las autoritads implementeschan uschia ina sentenzia dal Tribunal administrativ federal.
Quel era vegnì l'avust dal 2017 a la conclusiun che Eritreans che returnian en lur patria na sajan betg periclitads da vegnir clamads en l'armada, sch'els hajan gia prestà il servetsch militar. In returnar en lur patria na saja pervi da quai betg en general insupportabel.
Las autoritads federalas ston tenor lescha examinar regularmain ils status da las persunas cun ina permissiun transitorica. Perquai ha questa sentenzia era consequenzas per la pratica d'asil envers Eritreans ed Eritreanas en Svizra. Actualmain vegnan uschia examinads 3'200 dossiers. En tut vivan actualmain 9'400 Eritreans cun in status transitoric en Svizra.
RR novitads 06:00