La revisiun dal dretg penal avess tranter auter schluccà il secret da banca. La finamira era, che omettents da taglia na possian betg pli sa zuppar davos il secret da bancas. Uschia avess l'autoritad survegnì invista en documents da banca betg be en cas da suspect da fraud fiscal, mabain era tar suspect dad omissiun fiscala.
Cuntrareacziun sin ina cuntrareacziun
Quests plans da revisiun dal Cussegl federal avevan dentant provocà ina chadaina da cuntrareacziuns:
In comité da persunas da partidas da la vart dretga e dal center ha reagì cun in'iniziativa. Quella vul francar il secret da banca naziunal en la Constituziun e proteger uschia la sfera privata. L'iniziativa ha provotgà discussiuns en il parlament: Il Cussegl naziunal ha sustegnì l'iniziativa e sia cuntraproposta, il Cussegl dals chantuns percunter ha refusà tant iniziativa sco er cuntraproposta.
La soluziun: Cun ina moziun han tuttas duas chombras dumandà il Cussegl federal da desister da questa revisiun per pudair chattar uschia ina sortida or da questa situaziun problematica, uschia l'agentura da novitads svizra SDA.
Sch'il plan dal parlament vegn a funcziunar è anc avert
La gievgia ha il Cussegl federal dà enconuschent ch'el accepteschia las moziuns da las dus cumissiuns d'economia.
Uss è la balla puspè tar ils iniziants da l'iniziativa «Ea tar la protecziun da la sfera privata». Sch'els èn pronts da retrair lur iniziativa sut n'è dentant betg anc cler. En cas cuntrari vegn l'iniziativa en december preschentada al parlament.
RR novitads 12:00