Siglir tar il cuntegn

Header

Navigaziun

Purtret dal Tribunal penal federal a Bellinzona.
Legenda: Mesemna ha cumenzà il process cunter 6 persunas pervi da daners da corrupziun en il BAFU. Keystone
cuntegn

Svizra Il process davart daners da corrupziun el BAFU ha cumenzà

En il center dal process stat in project d'informatica en l'uffizi federal d'ambient (BAFU) ch'in dals accusads ha manà tranter il 2007 ed il 2010. Il manader da project duai avair dumandà da pliras interpresas pajaments da passa 118'000 francs.

Ensemen cun il schef da secziun dal Uffizi federal d'ambient, ch'è era accusà duai il manader da project avair procurà che las incumbensas èn idas a firmas ch'el sez controllava.

Products electronics e cartas per gieus da ballape

Il schef da secziun haja survegnì perquai regals ed invits. Tenor acta d'accusaziun sajan el e sia dunna vegnids envidads ad in gieu da ballape tranter ils clubs da ballape da Barcelona e Basilea. Ils custs inclusiv pernottaziun duai esser stads tar 2'900 francs. Plinavant duai il schef da secziun avair survegnì apparats electronics per il BAFU, dentant duai el avair duvrà quels privat.

Er il manader dal project d'informatica vegn avant dretgira, perquai ch'el duai avair malduvrà daners per in'immobiglia en il chantun Bern. Per vegnir vid ils daners duai el avair sfalsifitgà bilantschas.

Pajà per incumbensas

Tar dus auters accusads sa tracti da directurs e societaris da firmas d'informatica. Quels duain avair pajà pliras giadas summas da totalmain 100'000 francs per las incumbensas survegnidas. Ulteriurs dus accusads duain avair gidà da survegnir licenzas per actualisaziuns da software a cust da la Confederaziun.

Il process duai durar trais dis. Anc è betg enconuschent cura ch'ins sappia quintar cun ina sentenzia.

RR novitads 10:00