Ethos surveglia in bun manaschi d'interpresas, Corporate Governance. La fundaziun s'occupa da conflicts d'interess, da mancanza dad independenza e d'accumulaziun da pussanza sin singulas persunas. Ussa vegn dentant renfatschà exact al president dad Ethos Dominique Biedermann dad avair accumulà memia blera pussanza sin sasez e da far nepotissem.
La critica vegn da l'intern
La manadra da la cassa da pensiun da la posta Françoise Bruderer e la cussegliera d'administraziun dad Ethos Monika Roth han crititgà Biedermann ch'el haja accumulà memia blera pussanza. Quai suenter ch'el haja midà post da schef da la fundaziun tar il president dad Ethos il 2015. Era che l'atgna dunna sesia en la direcziun fa part da la critica. Per las duas dunnas è quai stà il motiv per sa retrair.
Critica nungiustifitgada
Per il president da la fundaziun è la critica nungiustifitgada e perquai smanatscha el dad examinar pass giuridics envers las duas dunnas. «Nus avain ferms mecanissems da controlla ed ina clera separaziun tranter las incumbensas strategicas ed operativas», uschia Biedermann en ina intervista cun la gasetta Schweiz am Wochenende.
Gia la mesemna aveva Ethos communitgà in'autoevaluaziun. Finamira saja da segirar in reglament per la successiun en il cussegl administrativ. En l'intervista ha Biedermann uss communitgà ch'el vegnia a sa retrair uschè spert che la nova generaziun da cader saja pronta.
RR novitads 14:00