Siglir tar il cuntegn

Header

cuntegn

Svizra Il pli bel vitg da la Svizra 2016

En las quatter regiuns linguisticas da la Svizra sa zuppan numerusas perlas, vul dir vitgs da bellezza. Era quest onn tschertgain nus per la segunda giada il pli bel vitg – e vus decidais la finala tgenin che quai duess esser.

A partir dad uss enfin ils 16 da zercladur pudais vus far vossas propostas: Tgenin vitg represchenta il meglier la cultura, l’architectura ed il scharm d’ina da las quatter regiuns linguisticas? Sin basa da las vusch inoltradas datti in emprima selecziun da 12 vitg, trais per mintga regiuns linguistica.

Tgi vegn suenter Guarda, Soglio e Gruyère

«Le plus beaux village» è partì avant onns sco idea ed istorgia da success da noss collegas da Radio Télevision Suisse (RTS). Audituras ed aspectaturs han elegì onn per onn lur favurit. II 2012 era quai Evolène en il Valais, il 2013 Saillon medemamain en in Valais e 2014 alura Gruyère en il chantun Friburg.

Il logo da l'acziun «Il pli bel vitg da la Svizra». Tut en cotschen sin funs alv. Ins vesa ina bandiera ed ina clutger.
Legenda: Il logo da l'acziun comunaivla da la SRG/SSR e Ringier RTR

L’onn passà han ins alura schlargià la concurrenza sin tut la Svizra. Tranter ils finalists eran er las vischnancas Guarda e Soglio. Soglio ha la fin finala survegnì la distincziun «il più bel villaggio della Svizzera 2015».

Era quest onn lantscha l’SRG/SSR en partenadi cun differentas gasettas questa concurrenza.

Mintgin po dar giu sia vusch

En il decurs dal mais avust preschentan las quatter chadainas naziunalas da l’SRG/SSR e las gasettas «Schweizer Illustrierte», «Il Caffé» e «L’Illustré» quests candidats dal semifinal. Sin basa d’in voting datti alura in final tranter las quatter vischnancas cun la pli bleras vuschs. Mintgin po dar giu sia vusch per in dals 12 e pli tard per in dals quatter vitgs, independentamain da la regiun linguistica.

Inoltrai era vus vossa proposta per «Il pli bel vitg da las Svizra 2016» ed elegì pli tard voss favurit: Il pli bel vitg

Artitgels legids il pli savens