Siglir tar il cuntegn
cuntegn

Svizra Il plevon da las persunas senza tetg Ernst Sieber è mort

Il plevon evangelic-refurmà Ernst Sieber è mort cun 91 onns. El saja sa durmentà en pasch, han communitgà sia famiglia e las ovras socialas «Pfarrer Sieber».

Il plevon Ernst Sieber
Legenda: Il plevon Sieber ils 23 da favrer dal 2017, in di avant ch’el ha festivà ses 90avel anniversari. Keystone

Il plevon Sieber è s’engaschà fin a sia mort per glieud senza tetg, alcoholichers e drogads. Uschia deva el en il «Pfuusbus» a Turitg in tetg sur il chau per passentar la notg a persunas senza tetg e persunas a l’ur da la societad. Plinavant ha el creà bleras purschidas da sustegn.

Tut ha cumenzà sco famegl

Ernst Sieber ha cumenzà sia carriera professiunala sco famegl. Pli tard ha el prendì suenter la matura, ha studegià teologia ed è daventà plevon. In plevon che na vuleva betg mo pregiar. Ernst Sieber era docter honoris causa da l’universitad da Turitg. Il 2017 ha el survegnì, per sia ovra da vita, il premi «Lifetime Award» dal «Prix Courage», ch’è vegnì stgaffì be per el.

RR novitads 20:00