Siglir tar il cuntegn
Inhalt

Svizra Il papa vegn a s'inscuntrar cun trais cussegliers federals

Ils 21 da zercladur vegn papa Francestg spetgà a Genevra. Durant sia visita en Svizra vegnan il president da la Confederaziun Alain Berset, la cussegliera federala Doris Leuthard ed il cusseglier federal Ignazio Cassis a s'inscuntrar cun il papa.

Il papa Francestg che sorta d'in aviun.
Legenda: Gist cun trais cussegliers federals vegn il papa a s'inscuntrar durant sia visita en Svizra. Keystone

Beneventà a la plazza aviatica da Genevra vegn papa Francestg dal president da la Confederaziun, Alain Berset, il cusseglier federal Ignazio Cassis, il president dal cussegl naziunal, Dominique de Buman, sco er d'ina delegaziun da la regenza da Genevra. Quai han las autoritads federalas communitgà il mardi a Berna. Plinavant è er previs in barat tranter il papa ed il president da la Confederaziun sco er in inscunter cun il cusseglier federal Ignazio Cassis ed il president dal cussegl naziunal.

Papa Francestg vegn a Genevra a visitar il cussegl ecumenic da las baselgias che festivescha ses 70avel anniversari dapi sia fundaziun. Suenter la messa planisada en las hallas da la Palexpo vegnan Alain Berset e la cussegliera federala Doris Leuthard a dar adia al papa.

Accumpagnà vegn il papa en Svizra dal cardinal svizzer Kurt Koch, il president da dal cussegl papal per promover l'unitad dals cristians. Plinavant vegnan er spetgads auts represchentants da la Sedia Sontga a Genevra.

RR novitads 14:00