Siglir tar il cuntegn

Svizra Il nov minister da finanzas: Ueli Maurer

Dapi il 2009 ha Ueli Maurer manà il Departament da defensiun, protecziun da la populaziun e sport. A partir dal 2016 daventa Maurer il nov minister da finanzas. Ses collega da partida Guy Parmelin succeda sco minister da defensiun. Ils ulteriurs cussegliers federals salvan lur departaments.

Ueli Maurer.
Legenda: Parmelin (san.) e Maurer (dre.) dattan pled e fatg a las medias. Keystone

Questa decisiun ha la Regenza federala prendi il venderdi.

Cun la demissiun da Eveline Widmer-Schlumpf è il departament da finanzas daventà vacant per l’entschatta dal 2016. La giurista aveva manà il departament dapi l’october 2010.

In um versà cun cifras che sto cunzunt spargnar

Er Ueli Maurer è versà cun cifras. Avant sia carriera politica aveva el l’emprim absolvì in emprendissadi mercantil e suenter fatg il diplom federal da contabilist.

Da si’antecessura erta Maurer blers dossiers difficultus ed ina cassa federala vida. Maurer è il prim minister da finanzas da la Partida populara svizra PPS.

Ils proxims onns sto Maurer cunzunt spargnar. Il Cussegl federal planisescha da dar ora mintg’onn radund ina milliarda francs damain che planisà. Uschia vegn il nov minister da finanzas probablamain en ina situaziun malempernaivla da stuair represchentar collegialmain tagls finanzials tar ils purs e l’armada.

RR novitads 15:00