Il martgà da lain patescha sut il ferm franc

Il ferm franc indeblescha anc adina il martgà svizzer da lain. Ils pretschs èn sa reducids, uschia che l'economia ha era pinà damain lain che l'onn avant.

Mantun da lain

Legenda da maletgs: Ord il motiv che la vendita da lain stagnescha vegn producì damain per las reservas. Keystone

L'onn passà è il pretsch da lain crudà per 6% – quai rapporta l'Uffizi federal da statistica. Lain d'industria è crudà per 9% en il pretsch. Uschia è era il retgav sa reducì da 70 sin 65 francs per il meter cubic. Tras il ferm franc è l'export da lain sa reducì, uschia ch'el vegn vendì surtut aifer la Svizra.

Tenor l'Uffizi per l'ambient è era il volumen pinà sa reducì. Cun 4,6 milliuns meters cubics lain èn quai 7% damain ch'il 2014. Tar il segment principal da lain da mutagl datti in minus da 10%.

Situaziun economia forestala en il Grischun

Era l’economia forestala Grischuna percorscha l’influenza dal ferm franc svizzer. Il pretsch da laina è medemamain sa sbassà da 70 francs sin 65 francs per meter cubic. Cunquai ch'il martgà da lain è in martgà internaziunal sa sbassa il pretsch da lain grischun automaticamain sch’il prezi va enavos en l’entira Europa.

Fertant ch’il pretsch è ì enavos resta il quantum da lain dentant pli u main tuttina en il chantun Grischun. Quai ord il motiv ch'ina gronda part dal lain sto vegnir runcada. Tenor Reto Hefti da l'uffizi forestal grischun ston ferm trais quarts dal guaud vegnir runcads per pudair tgirar il guaud da protecziun.

La consequenza è ch’il quantum da laina runcada è mo sa sbassada per 0,4% cumpereglià cun l'onn precedent. La laina vegn dentant vendida per in pretsch pli bass, quai oravant tut en l’Italia ed en l’Austria.

RR novitads 14:00