Siglir tar il cuntegn
cuntegn

Svizra Il Limmattal survegn ina nova colliaziun da tren

Il suveran dal chantun Turitg ha approvà in credit da 510,3 milliuns francs per ina nova lingia da viafier en il Limmatal. Quai cun in cler gea da 64,4%.

La «Limmattalbahn» sto anc gudagnar ils cors dals abitants dal Limmattal.
Legenda: La «Limmattalbahn» sto anc gudagnar ils cors dals abitants dal Limmattal. SRF/ZVG

La nova lingia vegn a colliar il chantun Turitg cun il chantun Argovia da las vischnancas sanester da la Limmat cun la lingia S existenta. En tut custa il project 755 milliuns francs. 35% dals custs da construcziun surpiglia la Confederaziun.

In cler gea per la «Limmattalbahn» - danor dal Limmattal

219'738 votantas e votants han vuschà gea, 121'199 na. La participaziun munta a 39,7%. En las regiuns pertutgadas ha il project dentant fatg naufragi: tuttas 8 vischnancas dal Limmattal han refusà la contribuziun dal chantun.

Percunter è il project incontestà en il chantun Argovia. Il Cussegl grond da l’Argovia aveva beneventà la contribuziun chantunala da stgars 180 milliuns francs.

Project cun 27 fermadas duai esser terminà il 2022

Enfin il 2019 duai in'emprim sectur da la nova lingia tranter Turitg-Farbhof e Schlieren Geissweid èsser a fin. L'ulteriura part fin Killwangen en l'Argovia vegn stgaffida fin l'onn 2022. Per lung dal tschancun da 13 kilometers èn planisadas 27 fermadas.

RR novitads 16:00