Siglir tar il cuntegn
Inhalt

Svizra Il federalissem – ina schanza per l'UE

L’Uniun europeica sto sa refurmar per chattar danovamain sustegn tar la populaziun. Il federalissem e la subsidiaritad tenor model svizzer pudess esser ina pussaivladad.

Bandieras da la Svizra e da l'UE.
Legenda: L'exempel Svizra – pudess far cun ses princip da subsidiaritad bun servetsch a l'UE. Keystone

Cun Emmanuel Macron ha in politicher pro-europeic gudagnà l'elecziun presidiala en Frantscha. Ina da sias finamiras è da refurmar l'UE e da puspè far arder il fieu per l'idea europeica tar ils passa 500 milliuns avdants da l'Uniun europeica.

Ina via pudess esser da dar dapli paisa al princip da la subsidiaritad e dal federalissem. En Svizra in princip bain enconuschent che ha er contribuì al success da noss pajais.

Fissan la subsidiaritad ed il federalissem pia er in recept per l'UE? «Gea» din dus politichers.

Decretar da surengiu chaschuna resistenza

Che autras naziuns s’interesseschian per il sistem politic da la Svizra e prendian quel sco exempel saja in indizi per la buna qualitad da l'organisaziun da la Confederaziun. Quai di Ivo Bischofberger, il president dal Cussegl dals chantuns. Dapli subsidiaritad e federalissem faschessian perquai segir bain a l'Uniun europeica.

Portrait Bischofberger.
Legenda: Keystone
Il pievel vul vegnir prendì serius. Ma sche tut è organisà a moda top-down lura na ston ins betg esser surprais sch’i dat resistenza.
Autur: Ivo Bischofbergerpresident dal Cussegl dals chantuns, (PCD/AI)

Quai è er l'avis da Benedikt Würth, il president da la conferenza da las regenzas chantunalas. In stadi organisà a moda centrala saja da cumparegliar cun in bastiment da petroli grond che na sappia strusch pli sa muentar u reagir sin eveniments e privels nunspetgads. Quai frustreschia la populaziun, perquai che lezza veglia vesair resultats.

E sch'ins guardia lura sin la Svizra, nua che la collavuraziun tranter il stadi, ils chantuns e las vischnancas funcziuneschia en blers secturs fitg bain, lura chapeschia el, ch'ins veglia era en l'agen stadi dapli subsidiaritad e federalissem.

Portrait Würth.
Legenda: Keystone
Subsidiaritad vul dir, che quellas chaussas ch’ils stadis commembers san schliar sez duajan restar là. Quellas chaussas, che ston vegnir regladas en l'interess da l’entira federaziun, duajan vegnir schliadas sin quest nivel.
Autur: Benedikt Würthpresident da la conferenza da las regenzas chantunalas, (SG/PCD)

E gist quest princip haja contribuì al success da la Svizra, di Würth.

Schliar ils problems datiers da la populaziun è la schliaziun

Er Ivo Bischofberger è da l'avis, che la Svizra mussia quai a moda exemplarica. Mintga regiun saja differenta, saja quai pervi da la lingua, la topografia u la structura demografica ed economica.

Quels che lavurian al lieu sajan er las persunas che sappian co schliar quels problems il meglier. El è persvas: La strategia da schliar ils problems e las sfidas da sutensi purtass en blers cas schliaziuns, che fissan pli acceptadas che quellas che vegnan decretadas da surengiu – da Brüssel, en il cas da l'UE.

In pass en direcziun subsidiaritad fiss per omadus politichers perquai in pass en direcziun da dapli acceptanza per l’Uniun europeica.

RR actualitad 07:00