Provediders d’internet ston en futur guardar che tals cuntegns na cumparan betg pli sin lur paginas. La proposta actuala è in cumpromiss ch’ina gruppa da lavur ha elavurà il mars.
Proteger persunas da la cultura
La finamira da la lescha è surtut che las ovras da persunas creativas da la cultura vegnan protegidas meglier. Uschia hajan talas artistas ed artists il dretg d’ina indemnisaziun per lur lavur. Quai in dals arguments dal Cussegl federal.
Per l’utilisader ordinari na datti dentant betg grondas midadas, uschia cussegliera federala Simonetta Sommaruga. Uschia dastgan utilisaders privats er en il futur chargiar giu da l’internet in toc musica per lur diever privat senza stuair far quint cun consequenzas.
Dapli dretgs per fotografs
I dat dentant in'excepziun. La revisiun prevesa numnadamain da proteger meglier las fotografias. Oz giaudan mo quellas fotografias la protecziun dal dretg d'autur che valan sco ovras artisticas. Il futur duain tuttas fotografias esser protegidas, era quellas ch'ins ha fatg ellas vacanzas cul telefonin. Auter che oz na dastg'ins lura betg simplamain chargiar ina fotografia estra sin ses profil da Facebook ni Instagram. I dovra lura adina la lubientscha da l’autur da quella.
RR actualitad 17:00