Ina tribuna era plazzada entamez la plazza federala ed ils acturs eran tuts preschents. Sco per exempel cussegliera naziunala dal PLD Doris Fiala sco spavent da la giuventetgna. Ella gioga ina dunna pensiunada che ha engulà raps d'in giuven musicist da via. En quest cas dad Andri Silberschmidt, il president dals giuvens liberaldemocrats.
Dentant tgi che ha spetgà sin il teater annunzià, quel ha spetgà per nagut. In teater na haja betg dà. Tenor il politolog Mark Balsiger han ils adversaris manà la glieud per ils nas cun il teater betg giugà. Era la credibilitad giaja uschia a perder.
Tant top sco flop
Talas acziuns grondas nua che politichers daventan acturs datti adina pli savens. Tenor Balsiger san quellas esser tant top sco era flop.
Partidas sco era auters acturs politics emprovan tut per rivar en las medias. Els vulan esser creativ e plazzar lur posiziun. Quai struptgescha per part il bun gust u l’effect. Quai ch'è original per ils ins e penibel per ils auters …
E voilà. Era sch'i n'ha betg dà il teater empermess, la preschientscha en las medias è qua. Las scenas dal teater menziunà en dentant avant maun en videos dad amaturs. Gia per la votaziun davart la lescha d’energia hai dà videos nua che politichers daventan acturs. Dentant tant creativ ch'ils videos èn, els pon er avair in effect negativ. Sch'i n'èn betg fatg bain po la credibilitad dals politichers patir. I pudess era esser, che la chaussa sco tala, en quest cas il cuntegn da la refurma da rentas, va a perder.
Però Mark Balsiger è persvas che cun l'experientscha da votaziuns da las Svizras ed ils Svizzers han, na sa laschan els betg irritar da las acziuns dad adversaris sco era aderents.
Uss na sappian ils blers anc adina betg sco vuschar. La fasa decisiva saja quatter fins sis emnas avant la votaziun. Lura sa furman las opiniuns tar ina chaussa, di Balsiger vinavant. Ed a la fin datti segir anc ina u l’autra acziun pli u main creativa dals politichers. Il cumbat da votaziun ha numnadamain pir cumenzà.
RR novitads 12:00