Il december empermetta blers records da sulegl

Anc quatter dis vai fin ch'il december è a fin - e gia datti emprims records quai che pertutga l'aura sulegliva. Tant a Cuira sco era a Buchs en la Vallada dal Rain dal Son Gagl avevi dà fin dumengia saira dapli sulegl durant il december ch’ils davos decennis, scriva SRF meteo.

Ina chadaina da culms sut il tschiel sulegliv.

Legenda da maletgs: Las mesiras sistematicas dal sulegl vegnan fatgas dapi l'onn 1959. Keystone

Cun quai èn ils vegls records dal 2013 istorgia; almain per Cuira e Buchs. A Zermatt è numnadamain il record dal december 1991 era gia surpassà, quai cun 115 uras sulegl fin ier saira.

Ulteriurs lieus suondan

Oz datti fitg bler sulegl sur 700 meters sur mar ed en il sid. Il mardi datti vinavant sulegl, dentant in zic pli pauc en il Grischun ed en il sid. Er la mesemna e da Silvester pon vegnir rimnadas ulteriuras uras da sulegl. Fin Silvester po vegnir quintà cun novs records. A Tavau, Basilea e Glaruna èsi da far quint cun novs records gia vers glindesdi saira.

Tessin anc senza records

Il pli bler sulegl hai fin uss dà sin la Cimetta sur Locarno. Qua è il sulegl gia sa mussà dapli che 170 uras durant il mais da december. En il Tessin èn decembers cun bler sulegl però betg stgars, uschia ch’ils records dals 2001 èn anc valaivels. Sin la Cimetta era quai gia sis giadas pli sulegliv durant il december che quest onn. Er en auters lieus dal sid n’hai betg dà novs records.

Tut auter en l’onn nov

Suenter radund in mais è il ferm aut da la Mar Mediterrana consumà. A l’entschatta da l’onn nov datti in current fraid ed umid. Lura cuntinuescha l’aura cun aura varianta. Almain en la Bassa n’è il cumenzament da l’enviern er lura betg d’enconuscher.

RR novitads 14:00