Il Cussegl federal vuleva obligar las interpresas da far analisas da paja e ulteriuras mesiras per promover l’egualitad tranter um e dunna. La partida populara ha argumentà che l’egualitad saja gia daditg realisada. Quai ha alura procurà per reacziuns or da las retschas da la partida socialdemocratica che ha discurri da «satira reala».
La pledadra da la PS Martina Munz (SH) ha ditg che l’argumentaziun da la PPS haja procurà per in rir en la cumissiun. Tuttina na duaja la lescha betg vegnir midada. I saja da ponderar tge che mussia pli pauc respect envers las dunnas, da snegar la discriminaziun u da cementar ella tras francar quella en la lescha, ha ditg Munz.
Agid al svilup sut squitsch
Dasper la dumonda d’egualitad ha era l’agid al svilup dà da discutar. La sanestra vuleva francar che 0,7% da las entradas bruttas naziunalas vegnian investidas en l’agid al svilup. La dretga ha vulì sminuir las finamiras dad oz 0,5% sin 0,3%. Las pussaivladads finanzialas sajan limitadas, ha ditg Céline Amaudruz (VD). Il Cussegl naziunal sustegna dentant las propostas dal Cussegl federal da betg fixar ina quota per il plan da legislatura. Er fatg naufragi ha ina proposta da la partida cristiandemocratica. Els vulan focusar l’agid al svilup sin pajais nua che la Svizra ha era interess che la migraziun sa sminueschia.
La gronda part dal plan da legislatura aveva il Cussegl naziunal gia decis glindesdis. El è per gronda part restà tar las propostas dal Cussegl federal. En tut ha il Cussegl federal proponì 60 finamiras, mesiras ed ulteriuras pretensiun per la perioda da legislatura actuala.
Il Cussegl naziunal vul spargnar
Cun ina proposta da renviada vuleva la sanestra impedir il curs dal Cussegl naziunal da spargnar e da manar il curs sin ina vart pli sociala. Il Cussegl naziunal ha dentant decis da renunziar sin expensas da 500 milliuns ad onn. La fatschenta va uss en il Cussegl dals chantuns.
RR novitads 11:00