La presidenta da la Confederaziun Doris Leuthard fa tenor indicaziuns da ses departament vacanzas da stad en Svizra. Las vacanzas vegnan dentant adina puspè interruttas da termins da lavur. Uschia vegn Leuthard per exempel a viagiar tranter ils 11 ed ils 14 da fanadur en l’Africa e sco presidenta da la Confederaziun vegn ella a tegnair plirs pleds durant las festivitads dal prim d’avust. Era ils ulteriurs commembers dal Cussegl federal vegnan tuts a tegnair plirs pleds d’emprim d’avust.
Johann Schneider-Ammann vegn a passentar las vacanzas en Svizra, ma durant la stad spetgan termins en la Russia, l'Indonesia, l'Arabia Saudita ed ils Stadis Unids. Simonetta Sommaruga vegn a far ina visita da lavur en la Tunesia per pudair s'inscuntrar cun pliras gruppas da contact per lung la via da migraziun en l'Europa, ma ella vegnia a far vacanzas en Svizra ed insanua auter, scriva il Departament da giustia.
Per Didier Burkhalter èn quai las ultimas vacanzas sco cusseglier federal. El vegn a passentar temp en il chantun Neuchâtel e viagiar a l'inscunter da l'OSCE a Vienna. Il cusseglier federal Guy Parmelin vegn a passentar ina part da sias vacanzas en la Toscana, ed era Alain Berset vegn a far ina part da sias vacanzas en l’exteriur e l’autra part en Svizra, scrivan ils departaments.
Sco adina n’ha Ueli Maurer betg vulì tradir ses plans per las vacanzas, quai saja ina chaussa privata.
RR novitads 14:00