Siglir tar il cuntegn

Header

cuntegn

Svizra Il cumponist da "Alperose" Hanery Amman è mort

Il musicist bernais saja mort la sonda saira en il ravugl stretg da sia famiglia en la vegliadetgna da 65 onns. El vala sco in dals piuniers dal rock dialectal.

L'invenziun dal rock svizzer dialectal

Hanery Amman oriund dad Interlaken era musicist, chantadur e cumponist. Ensemen cun Polo Hofer ha el introducì ils onns '70 en Svizra la musica da rock cun texts en tudestg svizzer, il Mundartrock. Dapi ils onns '80 era Amman sin turnea sut ses agen num.

Amman e Hofer – ils dus gronds cumpogns e musicists moran il 2017

Il genre dal rock dialectal svizzer era vegnì enconuschent ils onns settanta en emprima lingia entras la band Rumpelstilz. Tar ella tutgava sper Hanery Amman er ses cumpogn Polo Hofer, ch'è mort avant tschintg mais.

Gronds hits

Ensemen cun Polo Hofer ha Hanery Amman er cumponì l'imni inufficial da la Svizra «Alperose». Plinavant derivan ils hits «D'Rosmarie und I» e «Teddybär» ord la plima d'Ammann.

Ils piuniers dal rock dialectal. En amez Hanery Amman, sanester dad el Polo Hofer.
Legenda: Rumpelstilz: Ils piuniers dal rock dialectal. En amez Hanery Amman, sanester dad el Polo Hofer. Keystone

«merci vilmaal, hanery»

Il musicist pativa dapi il 2007 da cancer dal lom. Sin cussegl da ses medis aveva Hanery Amman stuì annular ils 29 da settember 2017 tut ses concerts enfin la fin da l’onn.

Sin sia pagina en la rait aveva il musicist scrit, ch’i dependia dals resultats da las proximas examinaziuns medicinalas, co ch’i vegn ad ir vinavant. Quai era si’ultima communicaziun sin sia pagina.

Ella finescha cun «merci vilmal, hanery».

RR novitads 18:00

Artitgels legids il pli savens