Siglir tar il cuntegn
cuntegn

Svizra Il cudogn è il fritg da l'onn 2017

Per l'onn 2017 ha l'uniun «Fructus» elegì il cudogn sco fritg da l'onn. Ils ultims 25 onns èn las plantas da cudogn sparidas or da blers curtins da pumera.

Cudogns anc vi da la planta.
Legenda: Il cudogn è il fritg da l'onn 2017. Pixabay

L'uniun «Fructus» che promova sorts veglias da puma en Svizra ha elegì per la 10avla giada il fritg da l'onn. Per il 2017 è quai il cudogn – la quitta. Sco l'uniun scriva saja il cudogn ils davos 25 onns praticamain svanì ord ils curtins da puma en Svizra.

L’onn 1951 eran vegnì dumbrads 113’000 plantas da cudogns en Svizra e 40 onns pli tard mo anc 50’000. Cun l’arsira da plantas ch’è sa derasada l’emprima giada l’onn 1989 è il dumber da plantas anc ina giada sa sminuì.

Project naziunal d’inventarisaziun

L’Uffizi federal d’agricultura ha dà l’incumbensa a l’uniun «Fructus» da far in project d’inventarisaziun da las plantas da cudogn en Svizra. Finamira da quest project esi, da chattar ora dapli sur da las differentas sorts da cudogn ch’i dat en Svizra. Fructus dumonda perquai la populaziun d’annunziar a l’uniun plantas da cudogn ch’han ina circumferenza pli gronda che 130 cm.

RR novitads 12:00