Siglir tar il cuntegn
cuntegn

Svizra Ignazio Cassis vegn minister da l'exteriur

Il nov elegì cusseglier federal surpiglia il departament federal d'affars exteriurs davent dal 1 da november. Tar ils auters departaments na datti naginas midadas.

Purtret dals set cussegliers federals e lur departament.
Legenda: Ils departaments èn surdads. I resta tut tuttina, e Cassis surpiglia da nov il departament federal d'affars exteriurs. RTR

Oz ha il cussegl federal scumpartì da nov ils departaments. Igl è gia ditg vegnì speculà che Ignazio Cassis surpiglia il departament federal d'affars exteriurs EDA. Uss èsi definitiv. Il departament surpiglia Ignazio Cassis il 1 da november e remplazza cun quai Didier Burkhalter. Cun Ignazio Cassis sco nov minister da l’exteriur resta il departament en mauns liberaldemocrats.

  • Doris Leuthard (Presidenta da la confederaziun)
    Departament federal per ambient, traffic, energia e communicaziun
  • Alain Berset
    Departament federal da l'intern
  • Ueli Maurer
    Departament federal da finanzas
  • Simonetta Sommaruga
    Departament federal da giustia e polizia
  • Johann Schneider-Ammann
    Departament federal d'economia, furmaziun e retschertga
  • Guy Parmelin
    Departament federal da defensiun, protecziun da la populaziun e sport
  • Ignazio Cassis
    Departament federal d'affars exteriurs

Il cusseglier federal ch'è il pli ditg en uffizi dastga giavischar sco emprim tge departament ch'el u ella vul manar. Actualmain è quai la cussegliera federala Doris Leuthard. Ella tegna il departament federal per ambient, traffic, energia e communicaziun. Era ils auters cussegliers federals ch'èn gia en uffizi tegnan lur departament.

Differentas spetgas da las partidas per Cassis

La partida liberaldemocratica svizra è cuntenta cun l'incumbensa futura da ses nov cusseglier federal. Ignazio Cassis saja sco fatg per represchentar la Svizra en l'exteriur scriva la PLD. La PCD na spetga il mument naginas grondas midadas en la relaziun da la Svizra cun l'UE. In sulet cusseglier federal na fetschia anc nagina politica d'Europa. Il president da la PPS, Albert Rösti ha ditg ch'els spetgian da Cassis ch'el realiseschia quai ch'el haja proponì a l'audiziun, numnadamain da sa distanziar da la cunvegna da basa cun l'UE.

RR novitads 14:00