Siglir tar il cuntegn
cuntegn

Svizra I vegn pli simpel da schluppettar il luf

Il Cussegl dals chantuns schlucca las reglas per schluppettar il luf anc pli fitg che quai ch'il Cussegl federal aveva proponì. Las organisaziuns da la protecziun dad animals e da la natira smanatschan cun referendum. Bain pussaivel ch'il pievel vegn ad avair l’ultim pled en chaussa.

Legenda: Tadlar il audio Revisiun da la lescha da chatscha e passada al Cussegl dals chantuns. Durada 03:52 minutas.
03:52 min, Actualitad dals 13.06.2018.

Suenter ina debatta dad uras a la lunga ha il Cussegl dals chantuns tractà a fin la revisiun da la lescha da chatscha.

Ils amis da la chatscha en il Cussegl dals chantuns, ils blers dals represchentants da las partidas burgaisas, han pudì sa metter tras.

Lescha schluccada

La protecziun dal luf, dal luf-tscherver e dal castur duai vegnir schluccada. Sche il luf fa gronds donns duai quel pudair vegnir schluppettà. Quai era en territoris scumandads per la chatscha. Pli simpel duai era vegnir da schluppettar ils animals protegids sco il castur u il luf-tscherver. En l'avegnir duai esser pussaivel da decimar il dumber da las bestgas, dentant vegnan definidas las cundiziuns.

Dapli cumpetenza tar chantuns

Ils chantuns duain pudair decider sch'els vulan scursanir temporarmain il temp da schanetg da las bestgas dadas libras per la chatscha. Fin uss duvrav'ins in permiss da la Confederaziun. Nov duain ils chantuns survegnir la cumpetenza da decider senza lubientscha da la Confederaziun.

Patenta resta status quo

Il Cussegl federal vuleva che la patenta da chatscha vegn unifitgada per tut la Svizra. Quella proposta refusa il Cussegl dals chantuns. Tar la patenta duai tut restar sco fin uss. Uschia sa dovra ina legitimaziun chantunala per ir a chatscha.

Decisiun finala probabel a l’urna

Organisaziuns da l'ambient e da la protecziun dals animals smanatschan cun in referendum sche la nova lescha da chatscha na vegnia betg adattada considerablamain dal parlament. Sco proxim sto anc il Cussegl naziunal tractar la revisiun. E sch'il Cussegl naziunal suonda las decisiuns da la chombra pitschna po lura probablamain anc il pievel svizzer decider davart luf, casturs e luf-tschervers.

RR novitads 12:00