I tanschiss per 17 rotschas da lufs - actualmain hai trais

En Svizra avessi avunda preda e spazi da viver per 17 rotschas da lufs. Quai resulta d'ina examinaziun da l'uniun Kora che fa il monitoring d'animals da rapina gronds sin incumbensa da la Confederaziun.

Ina rotscha da lufs en il zoo da Basilea.

Legenda da maletgs: En Svizra avessi plaz per 17 rotschas da lufs en guauds e pastgiras. Qua ina rotscha en il zoo da Basilea. Keystone

Urs Breitenmoser, il manader da l'organisaziun, ha ditg vers la gasetta Schweiz am Sonntag ch'i dettia actualmain 30 fin 40 lufs en Svizra. Fin ussa sajan s'etablids trais rotschas - mintgamai ina en il chantun Grischun, en il chantun Vallais ed en il chantun Tessin. I saja dentant sulet ina dumonda dal temp fin ch'i dettia ulteriuras rotschas.

Tenor Breitenmoser dovrian ils lufs guauds e pastgiras sco spazi da viver. Da quai haja avunda en Svizra ed en l'entir territori alpin. Sch'ils lufs sa derasian na dapendia dentant betg mo da facturs ecologics, mabain er da l'acceptanza entaifer la populaziun. Il dumber da 17 rotschas vegnia probabel cuntanschì en bun 20 onns.

RR novitads 09:00