Siglir tar il cuntegn

Svizra Hotels ed abitaziuns da vacanzas ston pajar dretgs d'auturs

Las taxas da la Suisa, l'organisaziun per la protecziun dals dretgs d'auturs, èn dentant dispitaivlas e quai gia dapi onns. Il Tribunal administrativ federal ha confermà la tariffa correspundenta l'entschatta fanadur e refusà il recurs da Gastrosuisse e Hotelleriesuisse.

Telecumond da televisiun sin in quint da taxas per radio e televisiun.
Legenda: Hoteliers e possessurs da chasas da vacanzas ston pajar la normala taxa da radio e televisiun e dretgs'autur. Keystone

In recurs d'ina persuna privata aveva purtà a la glisch in sbagl da la Suisa, gia l'onn 2012/11. Tenor la decisiun dal Tribunal federal aveva la Suisa incassà nunlubidamain taxas da hoteliers e possessurs da chasas da vacanza sco er per chombras dad ospital.

Motiv era che talas chombras n'eran betg numnadas explicitamain en la tariffa correspundenta. Perquai mancava tenor il Tribunal federal la basa legala per l'incasso.

Stuì pajar enavos plirs 100'000 francs

Sco consequenza da la decisiun da Losanna ha la Suisa stuì pajar enavos a possessurs da chasas da vacanzas, hoteliers ed ospitals plirs 100'000 francs e quai per ils ultims 10 onns, pia per taxas incassadas dapi il 2002.

Elavurà tariffa suplementara

Per tuttina pudair incassar la tariffa ha la Suisa elavurà ensemen cun differentas partidas pertutgadas ina tariffa supplementara tar l'uschenumnda 'tariffa communabla 3a', la tariffa che reglescha il diever da musica e film davostiers en furma accumpagnanta.

Questa tariffa nua che chombras da hotel, dad ospital ed abitaziuns da vacanzas èn numnadas explicitamain ha la Cumissiun federala da cumpromiss per la gestiun da dretgs d'autur e da dretgs cunfinants lura lubì il 2013. Quai malgrà che la tariffa era dispitaivla tranter ils pertutgads. Uschia ha la Suisa gì la basa legala necessaria per pudair incassar la taxa.

Recurs n'ha betg purtà fritg

Cunter la tariffa supplementara han Gastrosuisse e Hotelleriesuisse fatg recurs avant il Tribunal administrativ federal. En in'emprima decisiun dal 2015 aveva il tribunal dentant decis ch'il recurs n'haja nagin effect sin las taxas. La Suisa ha pia pudì incassar vinavant.

L'entschatta fanadur 2016 ha il tribunal lura decis en favur da la Suisa e refusà il recurs. El ha schizunt decis che la tariffa valia retroactivamain enavos fin il 2013. Gastrosuisse ha entant decis da trair vinavant il recurs avant il Tribunal federal a Losanna.

Tariffa resta dispitaivla

Per la Suisa è cler: Hoteliers e possessurs da chasas da vacanzas fan in gudogn commerzial cun porscher radio e televisiun en lur chombras, las chombras hajan schizunt ina plivalur ed il niz na saja betg privat. Perquai stoppian els pajar dretgs d'auturs sco p. ex. tar ina preschentaziun publica d'in film.

Tut auter vesan quai p. ex. ils possessurs da chasas da vacanzas. Tenor Gian Derungs ch'è cumpossessur d'ina plattafurma d'internet per prender a tschains abitaziuns da vacanzas saja la tariffa surfatga e na stettia en nagina relaziun cun las entradas ch'ina abitaziun da vacanzas portia. Tut tenor quant ditg che l'abitaziun è affittada, variescha la tariffa tranter 100 e 400 francs ad onn. E quai sper la normala taxa da radio e televisiun che munta a 462 francs ad onn. Las entradas d'ina gronda abitaziun da vacanzas muntan tenor Gian Derungs a 5'000 fin 10'000 francs ad onn, senza avair tratg giu taxas.

RR actualitad 07:00+