La dumonda da latg da chaura saja s’augmentada ferm, ha ditg Ursula Herren, la directura da l’Uniun dals allevaturs da chaura svizra. En Svizra vegnia oz producì in terz dapli latg-chaura e dubel uschè bler chaschiel-chaura ch’avant 15 onns. 915 tonnas pur chaschiel-chaura èn vegnidas producidas l’onn 2015.
Vischinanza da Frantscha è impurtanta
Tenor Ursula Herren datti dapli chauras cunzunt en intschess nua ch’i dat cumpraders potenzials per il latg-chaura. En Svizra romanda ed il Giura hai ils ultims onns dà intgins novs manaschis cun chauras.
En questas regiuns dettia quai lura er ils pli blers manaschis pli gronds cun fin 400 chauras. La vischinanza da la Frantscha gioga tenor Herren in’impurtanta rolla. En Frantscha vegnan numnadamain consumads bler dapli products da chaura. Ils piuniers dal chaschiel-chaura hajan dentant cumenzà en autras regiuns sco la Svizra centrala, e quai pli baud.
Grischun tranter top 5
Las pli bleras chauras vegnan oz tegnidas en ils chantuns Grischun, Tessin, Vallais, Son Gagl e Berna. Tut tenor manaschi variescha il dumber d’animals dentant fitg. Fitg differents èn er ils motivs da tegnair chauras sco era las pretensiuns als animals.
Uschia pon esser centrals ils criteris economics sco la quantitad da latg, la producziun da charn e la tgira da la cuntrada u schizunt la bellezza dals animals, uschia Herren.
Producents da sentan cugliunads
La tratga e tegnida da chauras daventa tenor Herren pli e pli professiunala. Uschia è la qualitad dal latg e da ses products arrivada ad in aut nivel.
Crititgà ha ella il concern da latg Emmi perquai ch’el laschia madirar chaschiel-chaura ollandais a Kaltbach en il chantun Lucerna. In tal proceder dettia da pensar als allevaturs da chauras: «Ils producents da latg-chaura svizzers sa sentan cugliunads».
RR novitads 14:00