Siglir tar il cuntegn
Inhalt

helveCHia Zumthor engrondescha la Fondation Beyeler per 100 milliuns

La Fondation Beyeler a Riehen BS engrondescha ses museum d’art. Per 100 milliuns francs planisescha l’architect Peter Zumthor trais bajetgs novs sin il terren dasperas. Uschia duai la surfatscha d’exposiziun vegnir engrondida.

Il nov project da Peter Zumthor – l'engrondiment da la Fondation Beyeler e Riehen.
Legenda: Il nov project da Peter Zumthor – l'engrondiment da la Fondation Beyeler e Riehen. MAD

Fin ussa saja la mesadad dals custs per il project segirada, communitgescha la fundaziun. La construcziun duai però pir cumenzar sche er ils prims 10 fin 12 onns da menaschi èn finanziads. En in e mez fin dus onns pudessia quai esser il cas.

La dimensiun da la construcziun va bain a prà cun il caracter dal vitg da Riehen.
Autur: Peter Zumthorarchitect
Visualisaziun dal nov project da Zumthor.
Legenda: Visualisaziun dal nov project da Zumthor. mad

Il coc dal project è la «Villa» – in bajetg en furma da Y cun trais etaschas da betun. La surfatscha rauca da quel duai reflectar l'aura ed il conturn, sco quai che Zumthor declera. Las grondas fanestras duain laschar penetrar la glisch dal di e lubir la vista en la natira dal parc. La dimensiun da la construcziun giaja bain a prà tar il caracter dal vitg da Riehen.

Il museum da la Fontadion Beyeler tutga tar in dals pli frequentads en Svizra. Dapi sia avertura avant 20 onns èn vegnids dumbrads 6,5 milliuns visitaders. Entant manchia il plaz per l’atgna collecziun, che creschia adina puspè grazia ad emprests, uschia la fundaziun.

In return en la patria

Per Peter Zumthor è il project in return en la patria – el è naschì il 1946 a Basilea. Cun ses biro d’architectura ch’el ha fundà il 1978 a Haldenstein construescha Zumthor sin l’entir mund – er intgins museums – ed è vegnì undrà pliras giadas. En Svizra ha la Therme a Val S. Pieder laschà vegnir enconuschent el ad ina vasta publicitad.