Siglir tar il cuntegn

Header

audio
Bunura: Züri Fäscht – Marco Cortesi davart la segirtad
Or da Actualitad dals 06.07.2019.
laschar ir. Durada: 5 minutas 26 Secundas.
cuntegn

Züri Fäscht 2019 «La pli gronda sfida è la fulla da glieud»

In eveniment sco il Züri Fäscht, dovra buna organisaziun e mesiras da segirezza. Marco Cortesi è dapi 35 onns tar la polizia da la citad da Turitg, uschia ch'el ha vesì intginas festas en la citad. Ma la dimensiun dal Züri Fescht resta tenor el ina sfida. Intervista cun Marco Cortesi.

Signur Cortesi, quants policists vegnan ad esser en acziun al Züri Fäscht?

Mario Cortesi: Quantas persunas ch'èn en il servetsch na schain nus betg. Il Züri Fescht è ina gronda chaussa – era per nus. Quai sur tut ord vista organisatorica. Nus essan gia dapi 2 fin 3 onns en las preparativas per questa festa, uschia ch'ins po dir era qua; suenter la festa è avant la festa!

Quai munta che mintga policist e policista da la citad da Turitg è el servetsch questa fin d'emna?

Gea. Quai è uschia. Insacura durant quels trais dis sto mintgin/a lavurar. Quai era oravant tut pervia da che nus duvrain era blers policits en civil che observan la festa.

Tgenina è l'incumbensa principala da la policia turitgaisa durant la festa?

Fitg impurtant è, che nus pudain lavurar bain ensemen cun las autras organisaziuns, sco p. ex la sanitad, il comité d'organisaziun da la festa – ma era cun ils collegs e las collegas dal servetsch dal salvament maritim. I dovra fitg blera glieud per organisar in eveniment uschia, per che nus possian garantir la segirezza durant la festa.

Da l'autra vart èsi da proteger l'entira festa. Quest onn avain nus per l'emprima giada introducì in sistem che tegn enavos vehichels che vulan carrar en la festa. Cun quai sistem pudain nus serrar giu tut las vias enturn la citad aifer ina mes'ura.

Vus essas gia dapi 35 onns da la partida tar la polizia da Turitg ed avais uschia era vesì intgins Züri Feschts - tge è semidà il pli fitg durant quels onns?

Il pli grond midament è la blera glieud. Quai è la pli gronda sfida per nus, ch'i na dettia betg panica en in lieu. Per avair la survista faschain nus diever da helicopters, e spezials sistems digitals. Il grond privel è natiralmain il mument, cura ch'il fieu artifizial vegn envidà. Blera glieud ha lura il sentiment ch'ins vesia quel sulettamain davent da la Quaibrücke. Quai che n'è betg il cas. Il uschenumnà Crowd-Management dovra da nus il pli grond sforz.

Tge criteris ston vegnir ademplids che Vus mirais enavos dumengia saira e schais; La polizia ha fatg buna lavur?

Quai è lura, sche nus n'avain betg gì problems extraordinaris. Problems extraordinaris fissan per exempel, sch'i dess in cas mortal, u sche dunnas vegnissan attatgadas da tschertas persunas. Ma nus essan segirs, che nus pudain far ina bella festa senza gronds problems, uschia che jau poss segir dir dumengia saira, quai è stà in bel Züri Fäscht!

RR novitads 07:00

Artitgels legids il pli savens