Siglir tar il cuntegn

helveCHia Vallais po sustegnair finanzialmain pendicularas

Il Cussegl grond ha approvà ina tala lescha. Quella prevesa tranter auter da stgaffir in fondo chantunal e da pussibilitar da dar emprests e garanzias.

la pendiculara da Saas Fee, ina da 42 societads da pendiculara dal Vallais
Legenda: La pendiculara da Saas Fee è ina da 42 pendicularas che pon da nov survegnir sustegn dal chantun. Keystone

Da nov po era vegnir subvenziunada l'infrastructura d'impurtanza regiunala u chantunala, sco per exempel las colliaziuns tranter territoris da skis. Tenor il minister d'economia dal Vallais, Christophe Darbellay saja la nova lescha in ferm e cler signal per la branscha e per il turissem en il chantun. Ils adversaris, Verds e sanesters, han argumentà che tals sustegns per pendicularas sajan daners pers.

President da las pendicularas dal Vallais beneventa la nova lescha

Quella lescha na spendra betg las pendicularas, ma igl è daners che fetschian bain a bleras pendicularas en il chantun, quai ha il president da las pendicularas dal Vallais, Berno Stoffel ditg al schurnal regiunal dad SRF. Mo pendicularas che sajan finanzialmain saunas profiteschian dentant da la lescha nova.

Betg tuts eran per questa nova lescha

Oravant tut la sanestra era encunter la nova lescha che il Cussegl Grond ha approvà. I saja daners pers ha il deputà da la PS, Gilbert Truffer ditg. Las bleras pendicularas pitschnas na vegnian betg a surviver ils proxims diesch onns. Cun far investiziuns en questas pendicularas veglian ins mo prolungar in zic la vita a questas.

RR actualitad 11:00