Anc avant che la stagiun da chatscha ha cumenzà, han ins schluppettà l'onn passà 170 muntanellas a Zermatt. Lubi è quai vegnì perquai ch'i dat memia bleras muntanellas. Perquai pon ins vesair ellas adina puspè en vischnanca. Ellas fetschian foras en la prada dals purs di Peter Scheibler, il directur da chatscha, pestga ed animals selvadis dal chantun Vallais. I ha era dà foras sut la Matterhorn-Gotthard-Bahn.
Las muntanellas èn era idas en las purarias.
Ina moziun en il Cussegl grond dal Vallais vuleva far ina fin al sajettim. Dentant cun gronda maioritad han deputadas e deputads sbittà quell’idea mez mars. Cunter l'invasiun da las muntanellas stoppia ins simplamain agir.
Sajettim betg legitim
Tut commuventà e senza chapientscha per il sajettim da muntanellas è Eva Maria Kläy da la Pro Natura dal Vallais Sura. Per ella n'exista il problem da massa bleras muntanellas betg.
Fin oz ha ina muntanella anc mai fatg dal mal ad insatgi. Da schluppettar ellas en tala maniera è absurd. L’uman prenda davent a las muntanellas il lieu da viver e betg viceversa.
Sche i detta singulas muntanellas che rivan fin en chasa, sa possia prender mesiras per quellas singulas. Dentant da schluppettar tantas enfin che las autoritads dian che la populaziun saja uss regulada è faus. I saja l'uman che prenda davent a las bestgas il spazi da viver e betg sutsur.
Turists indignads
Dal sajettim da muntanellas han era turists udi. I haja dat inqual telefons sin biro da turissem da persunas che eran l’emprim in tic schoccadas di Simona Altwegg da Zermatt turissem: "Clar che la causa sco tala na è betg d'avantatg per il turissem." Ins hajan dentant declera ch'ins haja ina surpopulaziun da muntanellas ed uschè hajan turistas e turists mussa chapientscha.
Guardar tge che la primavaira maina
Sche las 170 muntanellas che han sutvi murir per reducir la populaziun mussan effect na pon ins anc betg dir di Peter Scheibler. Uss cuverna anc massa blera naiv la vischnanca da Zermatt. Cura che i vegn primavaira sa ves'ins sche i è grategià da regular la populaziun di Scheibler.
Nus na vulain betg simplamain schluppettar las muntanellas. Nus vulain regular lur populaziun a moda adequata.
Sch'ins vesa che las muntanellas èn anc adina in problem per la vischnanca, lura pudessi dar ina segunda acziun da schluppettar numerusas muntanellas en ina giada. Dentant, punctuescha Scheibler, era sche 170 muntanellas paran bler, saja quai mo ina pitschna, fitg pitschna part da tut la populaziun. Dentant quantas muntanellas che vivan propi en la regiun da Zermatt na san ins betg.
- Dapli dal project «Missiun B».
- Registrai Vossa surfatscha biodiversa sin missiunb.ch.
- As participai a nossa gruppa sin Facebook.
RR actualitad 12:00