Igl è stà in veritabel di da festa, ils 22 da december. La ministra da traffic svizra Doris Leuthard ed il minister da traffic talian Graziano Delrio han inaugurà la nova colliaziun da tren sur cunfin. 11 km binari collian Mendrisio en il sid dal Tessin cun la citad da Varese en il vest da l'Italia.
Evitar tensiuns cun il tren
L'avertura saja in simbol per las relaziuns stretgas tranter la Svizra e l'Italia, uschia Leuthard. «Ella reducescha natiralmain il temp da viadi. Mo in auter avantatg è che fitg blers cunfinaris pon ussa prender il tren. Nus savain che las vias èn qua savens stuppadas.» Ils autos dals cunfinaris che vegnan da l'Italia per lavurar en il Tessin e che turnan la saira puspè enavos blocheschan las vias ed occupeschan ils parcadis. Cun in tren possian ins evitar tensiuns. Ils pendularis duain pia laschar l'auto a chasa e prender il tren, giavischa la cussegliera federala.
Ils trens n'èn betg plains – anc betg
Uschè plains sco ch'ils trens eran tar l'inauguraziun n’èn ils trens che circuleschan dapi quest'emna tenor urari betg. «Anc betg», manegia in dals passagiers. En las proximas emnas vegnia quai segir a sa midar.
Quai che stoppia dentant vegnir meglier saja l'infurmaziun, di in auter pendulari. El haja vulì s’infurmar davart ils temps da partenza, n’haja dentant chattà nagut. Uschia saja el vegnì a la staziun sin bun gartetg. Era il directur dals trens regiunals TILO Denis Rossi è persvas ch'ins stoppia ussa far enconuschent la nova purschida e promover la glieud da midar da l’auto sin il tren. Anc quest'emna vegnia lantschada ina campagna d'infurmaziun per ils pendularis e per la populaziun sin tuttas duas varts dal cunfin. E per ils 20 da schaner envidian els ad in di da las portas avertas.
Prolungaziun enfin Milano
In'ulteriura midada dettia questa stad: Lura na circulescha il tren betg mo enfin Varese – mabain enfin agl eroport da Milano-Malpensa. Tenor Rossi augmentia quai l'attractivitad da la colliaziun nova considerablamain e saja ultra da quai era ina schanza per il turissem en il Tessin.
RR actualitad 12:00