Cumenzà cun la taxa da satg ha la citad da Son Gagl – e quai gia l’onn 1975. Dapi lura han adina dapli vischnancas midà sistem. Tgi che producescha bler rument duai era pajar dapli per dismetter quel. E rument datti ina massa. Il 2018 ha mintga avdant da la Svizra en media chaschunà passa 700 kg rument. Passa la mesadad da quel vegn dentant reciclà. Tenor ils experts è quai era in effect da la taxa da satg.
Che quella saja ina buna chaussa ha il 2011 era il Tribunal federal a Losanna constatà e decidì che l’entira Svizra stoppia introducir il principi da chaschunader, la taxa da satg. E nov onns pli tard èsi ussa era en il Tessin uschè lunsch. Quai suenter ina decisiun dal Cussegl grond ed ina votaziun da referendum.
Effect betg previsibel
Ma il sistem nov dat era da tschantschar. Previs era numnadamain da sbassar cun l’introducziun da la taxa da satg era la taxa da basa per dismetter il rument. Quai conferma era il schef da la secziun protecziun da l’aria, da l’aua e dal terren dal Tessin, Giovanni Bernasconi.
La gronda part da las vischnancas èn suandadas il cussegl da la regenza ed han sbassà la taxa da basa. La raschun è che la gronda part da las entradas per finanziar la dismessa dal rument duai vegnir da la taxa da satg, uschia ha la taxa da basa era pudì vegnir sbassada.
Avant betg curclà ils custs
En la pli gronda part da las vischnancas è quai pia schabegià. A Locarno pajan ils abitants ussa mo pli in terz da la taxa d’avant. I dat dentant era il cas cuntrari. Per exempel la vischnanca da Gravesano, datiers da Lugano. Là pajan ins ussa in quart dapli ch’avant. Pertge ch’i dat quellas differenzas, declera il sindaco da Gravesano, Maurizio Anghileri.
La decleraziun è simpla. Il chantun ha ditg che la taxa da basa ensemen cun la taxa da satg duain curclar tut ils custs dal rument. Tar nus era quella quota dentant avant mo tar 40%. Perquai avain nus era stuì augmentar la taxa da basa per vegnir sin 100%.
Tenor ina retschertga dal chantun è quai era il cas tar 6 ulteriuras da las 115 vischnancas dal Tessin. Sche quai resta era uschia, saja dentant anc memia baud da dir, manegia Giovanni Bernasconi.
Emprimas adattaziuns proxim onn
I manchia anc l’experientscha cun la taxa da satg. Bain pussaivel che las vischnancas che hajan ussa stuì auzar la taxa da basa, possian il cumenzament da l’auter onn puspè sbassar quella, u forsa era ch’inqual vischnanca stoppia anc ina giada sur ils cudeschs e far adattaziuns ensi. Quai ch’è dentant gia ussa cler è, ch’il rument vegn era vinavant a procurar per discussiuns en il Tessin.
RTR actualitad 12:00