Siglir tar il cuntegn
cuntegn

helveCHia Surpigliada nunamicabla en il Toggenburg

Cun in inserat vul la pendiculara Toggenburg SA motivar ils acziunaris da la pendiculara Wildhaus SA da vender lur aczias. Ina offerta che tuna en las ureglias da la pendiculara Wildhaus SA sc'ina planisada surpigliada nunamicabla.

Staziun da muntogna da la pendiculara Chäserrug - ina chasa en lain.
Legenda: La chasa sil piz dals architects Herzog & De Meuron sin il Chäserrugg da la pendiculara Toggenburg SA. Keystone

25 francs per aczia è la pendiculara Toggenburg SA pronta da pajar per in'aczia da la pendiculara Wildhaus SA. Per il president dal cussegl d'administraziun Jakob Rhyner ina impertinenza. L'aczia haja numnadamain ina valur da tranter 160 e 200 francs.

En pli saja quest plan malcurtaschaivel ed impertinent perquai che la pendiculara Wildhaus SA na saja betg vegnida infurmada, ha Rhyner confirmà envers SRF.

Salvar bigliet cuminaivel

Mélanie Eppenberger, la presidenta dal cussegl d'administraziun da la pendiculara Toggenburg SA ha ditg ch'ins veglia en emprima lingia salvar il bigliet cuminaivel per las pendicularas. E ch'ins veglia metter las duas pendicularas sut in tetg per evitar ch'il maun public stoppia gidar en l'avegnir.

Las duas interpresas da pendicularas portan ils giasts la stad e l'enviern en il territori da skis e viandar communabel dal Obertoggenburg.

RR actualitad 12:00