Siglir tar il cuntegn
cuntegn

helveCHia Suar empè da tremblar

Onns a la lunga tegnan ellas ora temperaturas extremas sin ils auts da nossas muntognas: las gondlas. E da quai profitan er ils dus designers Felix Tarantik e Toni Egger, però cun temperaturas extrem chaudas. Els fan saunas or da gondlas.

Legenda: Guardar il video Tge capita cun gondlas veglias?. Durada 01:50 minutas.
Or da Nouvo RTR dals 12.10.2018.

L’idea da far ord gondlas saunas han ils dus designers, oriunds da la Germania dal Sid, gì durant il studi. Els vulevan far in project cuminaivel. Per vesair sche lur idea funcziuna, han els cumprà duas gondlas, han prendì in gril, mess si crappa ed uschia simulà ina sauna. Svelt han els badà, che lur idea po vegnir realisada.

L’idea è da midar uschè pauc sco pussaivel. La gondla duai restar autentica.
Autur: Toni EggerDesigner

En las gondlas da 6 persunas han dentant mo lieu quatter persunas per ir a suar – la pigna dovra er plaz. Da chattar ina pigna adattada saja stada ina da las pli grondas sfidas, concedan Felix Tarantik e Toni Egger. Però era da pudair transportar las gondlas giud las muntognas enfin en ufficina saja adina puspè in'aventura dian els cun rir. Pli simpel saja da transportar e duvrar la sauna a chasa. I dovra «mo» forza electrica e lura funcziunescha la sauna.

Ina giada ch’ins ha la sauna en iert, pon ins spustar ella fitg simpel nua ch’ins vul – i dovra simplamain forza electrica e betg dapli.
Autur: Felix TarantikDesigner

Cun Küngsauna SA han els chattà in partenari per realisar il project. Anc en la fasa da realisaziun haja dà midadas e lur sauna vegnia anc adina sviluppada enavant, dian ils dus designers. Quai era cun agid dal falegnam Slavi Vidakovic ch'è sa spezialisà sin las saunas ord gondlas.

Slavi Vidakovic è il falegnam ch'è sa spezialisà sin transfurmar las gondlas en saunas.
Legenda: Slavi Vidakovic è il falegnam spezialist per transfurmar las gondlas en saunas. RTR, Fabia Caduff
Per transfurmar la gondla en ina sauna dovrel jau ca. 5 dis.
Autur: Slavi Vidakovicfalegnam

Ils clients da las saunas èn oravant tut hotels pitschens che n'han betg in agen lieu per far wellness. Dentant datti bleras persunas privatas che mettan la gondla en iert. Duas saunas stattan perfin en Nova Zelanda. Quantas gondlas ch'els han vendì en tut na vulevan els betg tradir.

RR actualitad 12:00