Locarno saja in festival extraordinari, ha Giona Nazzaro ditg a chaschun da sia preschentaziun l’emna passada. Quella ha gì lieu natiralmain en ina sala da kino dal festival. Per el saja si'elecziun sco directur artistic in siemi che daventi realitad.
Il festival da Locarno èn 74 onns cumbat per in kino liber, d'auturas ed d'auturs, independent, giuven, che sa sviluppa. Per mai ina onur nunditga.
Malgrà sia naziunalitad taliana, Giona Nazza è naschì a Turitg. El ha studegià litteratura tudestga ed englaisa a Napoli ed ha lavurà sco schurnalist da film e curatur per differents festivals. Quai tranter auter era al festival da Locarno, nua ch'el ha moderà conferenzas da pressa e discurs cun cineasts da tut il mund. Enfin dacurt ha el manà l’emna da la critica al festival da film da Venezia.
Corona ha tutgà ferm l'industria da film
Pia ina persuna bain connectada en il mund da film. El sa perquai era con ferm che la branscha patescha da las consequenzas dal coronavirus. Lezza saja en ina veritabla crisa, di Nazzaro. Gist perquai saja impurtant ch'il festival da film haja lieu l'auter onn.
«Nus stuain restituir la fidanza en l’industria da film, en la distribuziun ed en la producziun. Mo jau pens era vid la part artistica, tut ils acturs che han ussa pli pauca lavur, ils reschissurs e scenografs. Perquai èsi oz essenzial d’avair in festival, per uschia lantschar da nov l'entira economia dal sectur.»
Mo simpel na vegn quai betg. Quai conceda era il nov directur artistic. Anc dettia blers facturs che possian impedir la renaschientscha dal kino.
Transfurmar il festival senza perder l'identitad
Sper corona datti anc autras sfidas che spetgan. Co far pront il festival da Locarno cun tut sia tradiziun per il futur, la digitalisaziun ed l’innovaziun tecnica – e tut quai senza perder l'atgna identitad, che fa or il festival, il public, la piazza e las scuvertas? Locarno saja dapli che mo ils diesch dis dal festival l’avust, respunda Giona Nazzaro.
«Locarno, quai è la secziun Open Doors cun films da pajais lontans, Locarno è l'academia da film, e Locarno vegn ad esser il futur anc dapli, Locarno 365, in event che ha lieu l’entir onn e che transfurmescha Locarno en ina citad audiovisuala. Quai empermet jau!»
Chaschun da realisar sia visiun ha Giona Nazzaro davent da l'entschatta da l’onn. Pauc temp, mo sco «habitué» enconuscha el schon ses festival e sa nua ch'i dovra ils dretgs impuls.