Siglir tar il cuntegn

Header

cuntegn

Katar 2022 A Vevey vegn boicottà il campiunadi mundial da ballape

Guardar il campiunadi da ballape a Katar u betg? Ina dumonda che la citad da Vevey ha respundì cun na. Pervi da las circumstanzas politicas ha la citad decidì da boicottar l'occurenza. Era en autras citads, cunzunt en la Svizra franzosa, vegn discutà davart il tema.

Suenter che diversas citads da la Frantscha han decidì da scumandar tut las activitads en connex cun il campiunadi mundial da ballape sin il spazi public, ha uss era Vevey fatg quai, la citad dal Vad a la riviera dal Lac Léman. Uschia ha declerà la cussegliera da la citad, Laurie Willommet envers RTS.

I n’è betg cunter il sport, i n’è betg cunter il ballape, igl è cunter il context politic. Igl è in’occurrenza sut circumstanzas che cuntrafan als dretgs umans cun cundiziuns da lavur ch’èn pli che deplorablas e ston vegnir accusadas.
Autur: Laurie Willommet Cussgliera da la citad da Vevey

La decisiun na scumonda dentant betg a bars ed ustarias da mussar ils gieus da ballape. Il scumond valia sin l’areal dal spazi public.

La decisiun da Vevey da scumandar il public viewing è fin uss ina decisiun unica en Svizra. Ma la discussiun enturn il campiunadi mundial dispitaivel ha era lieu en autras citads da la Svizra franzosa. Uschia ha per exempel Losanna decidì da betg sa participar a l’organisaziun da public viewings. Neuchâtel ha era fatg la medema decisiun, ha però acceptà dumondas d'organisaziuns privatas. A Genevra dat quai ina petiziun cunter in public viewing planisà. Il cussegl da la citad na vul dentant betg scumandar quel, ins haja dà il permiss avant tschintg onns als organisaturs privats.

audio
A Vevey vegn boicottà il campiunadi mundial da ballape
ord Actualitad dals 14.10.2022. Maletg: Keystone
laschar ir. Durada: 3 minutas 9 Secundas.

Tge che gira en las citads da la Svizra tudestga mussa ina retschertga da SRF. En las grondas citads sco Turitg, Basilea u Son Gagl na vegnia quai betg a dar gronds public viewings. Enfin ussa na sajan vegnidas fatgas nagina dumondas per organisar tals.

A Cuira datti in public viewing

Tenor la Polizia da la citad da Cuira han ins gì ina dumonda per in public viewing a Cuira. Quella è vegnida acceptada e l'organisatur privat haja survegnì il permiss. La citad sezza n'organisescha nagin public viewing.

RTR actualitad 11:00

Artitgels legids il pli savens