Siglir tar il cuntegn
cuntegn

helveCHia Invasiun da corvs champesters a Berna

La citad da Berna ha in problem ch'ella na vegn betg da schliar. Ils corvs champesters prendan suramaun.

Legenda: Tadlar il audio Mezdi: HelveChia – Berna ha in problem cun ils corvs champesters. Durada 04:03 minutas.
04:03 min, Actualitad dals 24.05.2018.

Ins vegn alert ed ins va enta letg cun ils corvs champesters en la citad da Berna. Passa 1'000 pèrs vivan en la chapitala e lur fastizs laschan els enavos sin autos, velos e vias.

Cumenzà ha tut ils onns 80, e dapi lura datti adina dapli corvs champesters. Adina dapli colonias sa chasan en la bostga da Berna. Sabine Tschäppeler, la manadra da l'Uffizi da la natira da la citad da Berna, di che quai haja da far cun il nutriment che plascha als corvs a Berna. Ed uschè ditg ch'il nutriment e avant maun datti er adina dapli corvs champesters, di Tschäppeler vinavant.

Mintg’onn dapli

I vegnan adina dapli corvs, era sch’ins haja empruvà dal tut per scurrentar els. Ils utschels sajan simplamain memia furbers, di la biologa Sabine Tschäppeler.

Blau: colonias veglias / cotschen: colonias novas.
Legenda: Las colonias dals corvs champesters Blau: colonias veglias / cotschen: colonias novas. Stadtgrün Bern
Nus avain empruvà da scurrentar ils corvs cun lasers e reflecturs, intgins dis ha quai funcziunà. Dentant ils corvs èn animals fitg scorts ed han svelt realisà che quels na fan nagut ad els.
Autur: Sabine Tschäppelermanadra servetsch natira da la citad da Berna

Ins ha era empruvà da prender giu ils gnieus, e lura, anc ils medems dis han ils corvs puspè bajegià si in nov gnieu. Ins ha era empruvà da tagliar la bostga, dentant era quai n'ha betg funcziunà. Sco era betg da metter aissas là nua ch'ils corvs champesters fan lur gnieus. Quellas hani duvrà sco protecziun cunter la plievgia. La glista da las chaussas ch’ins ha empruvà e anc lunga, dentant gidà pli ditg n'ha nagut.

Pivs da plastic

Dentant dapi quatter onns hajan ins in pitschen success cun attrappas da pivs. Da quellas han ils corvs tema. Dentant ston ins far ir cun agid d'ina corda adina puspè las alas dal piv, per ch'ils corvs na remartgian betg che quai è mo ina attrappa da plastic. Per il pli èn quai ina gruppa da vischins che fan quai. Mintga di arrivan lura plirs corvs per controllar, sch'il piv è anc en la bostga.

L'attrappa dal piv para da far effect, dentant ston las alas adina puspè vegnir muventadas ensi ed engiu per scurrentar ils corvs champesters.
Legenda: L'attrappa dal piv para da far effect, dentant ston las alas adina puspè vegnir muventadas ensi ed engiu per scurrentar ils corvs champesters. Stadtgrün Bern

Sabine Tschäppeler di però ch'ins sappia tenor experientscha en auters lieus che baud u tard remartgan ils corvs che quai n'èn betg dretgs pivs.

Empruvà hajan ins ina pluna, uss hajan ins però quasi dà si. Activamain na fetschian ins nagut pli per scurrentar ils corvs, ma sch’ins audia da metodas che funcziunan, emprovian ins ora quellas. Uschia che entant sa dasdan ils Bernais cun il cratschlim e van enta letg cun ils ultims tuns dals corvs champesters.

RR actualitad 12:00