Ins stoppia proteger ils animal selvadis dals chatschaders che giaudian lur hobi sin donn e cust dals pli flaivels, ils animals. Quai di Monika Heierli. Sco exempel numna ella la chatscha sin las vulps. Il chaun vegnia chatschà en la tauna da la vulp. En la lescha stettia dentant, ch’ins na dastgia betg far mal ad in animal. Gist quai vegnia dentant fatg cun la chatscha tradiziunala.
Iniziants: «La natira duai regular»
Ensemen cun ses collegas da la Partida svizra per ils animals ha Monika Heierli inoltrà l’iniziativa che pretenda che la chatscha da revier en il chantun Turitg vegnia scumandada. La tgira dals animals selvadis duajan surprender circa 100 guardiaselvaschina emploiads dal chantun. Quai tanschi, di Heierli. Ils chatschaders na dovria lura betg pli.
Els veglian che la natira reguleschia la populaziun dals animals selvadis, tras envierns fraids e dirs u la mancanza da nutriment:
En il chantun Turitg vegnan ils guauds duvrads uschè bler da la populaziun per sa recrear. E qua n’è la chatscha, uschia sco ch'ella vegn pratitgada oz, simplamain betg pli giustifitgada.
Adversaris: «Senza chatschaders datti problems»
Quai vesa Samuel Ramseyer tut auter. El è in dals circa 1'500 chatschaders en il chantun Turitg e sesa en la suprastanza da l'uniun «Jagd Zürich». Gia il titel da l'iniziativa na constettia betg, di el.
Era ils chatschaders sajan guardiaselvaschina. Ils chatschaders fetschian bler, per che la populaziun dals animals selvadis restia sauna. Scumandar la chatscha e simplamain surlaschar ils animals a sasezs e sperar che la natira regleschia lura schon tut:
I dess dapli donns tras ils animals. Ed era la populaziun fiss periclitada pervia da malsognas ed epidemias.
Chatscha saja la raschun per ils problems
Sch'i dettia insanua problems sappian anc adina ils guardiaselvaschina intervegnir a moda professiunala, respunda Monika Heierli. Quai saja bler pli effectiv che la chatscha dad oz.
Lezza chaschunia dapli problems che quai ch'ella schlia. U ch’ella haja extirpà ils animals u ch’ella haja procurà per ina surpopulaziun. Ils votants e las votantas na crajan betg pli quai che la lobi dals chatschaders raquintia. Ella saja perquai da buna speranza da pudair persvader la populaziun da scumandar la chatscha.
Davart l'iniziativa decidan ils votants e las votantas dal chantun Turitg ils 23 da settember a l'urna.
Tut da la chatscha grischuna 2018.
RR actualitad 11:00